Fréttir - Fjölmiðlar - Um bankann - Arion banki

Fjármálaeftirlitið og Seðlabanki Íslands sendu í morgun frá sér tilmæli um hvernig fjármálafyrirtæki skuli vaxtareikna lán sem innihalda óskuldbindandi gengistryggingarákvæði, sbr. dóma Hæstaréttar frá 16. júní sl. Þessum tilmælum er ætlað að brúa bilið þangað til dómstólar kveða upp endanlegan dóm í þessum efnum.

Þessar stofnanir hafa nú lýst afstöðu sinni um atriði sem óvissa ríkir um. Eftir stendur að tilmælin fela lánastofnunum að meta hvaða lánssamningar innihaldi óskuldbindandi gengistryggingarákvæði og hverjir ekki. Arion banki er að fara yfir erlenda lánasamninga í kjölfar þessara tilmæla og þess má vænta að þeirri vinnu ljúki í næstu viku. 

Í ljósi þeirrar stöðu sem uppi er hefur Arion banki ákveðið að framlengja lausnir sínar vegna erlendra íbúðalána um tvo mánuði eða til 1. september 2010. Bankinn tekur fram að betri réttur lántakenda er alltaf tryggður. Bankinn ítrekar einnig að engar nauðungarsölur vegna íbúðahúsnæðis verða hjá bankanum á þessu ári

Arion banki vonar fyrir hönd viðskiptavina sinna að úr þessu óvissuástandi verði skorið sem allra fyrst.