Fréttir - Fjölmiðlar - Um bankann - Arion banki

• Lántakendur erlendra íbúðalána greiða 5.000 kr. af hverri milljón upphaflegs höfuðstóls lánsins á verðlagi við lánveitingu
• Nauðungaruppboðum frestað út árið 2010
• Betri réttur lántakenda tryggður
• Lausnir bankans vegna erlendra íbúðalána framlengdar til 1. september

Arion banki hefur ákveðið að bjóða einstaklingum með erlend íbúðalán hjá bankanum, með veði í fasteign, að greiða mánaðarlega 5.000 kr. af hverri milljón upphaflegs höfuðstóls lánsins á verðlagi við lánveitingu. Viðskiptavinur með 13 milljón kr. erlent íbúðalán myndi samkvæmt þessu greiða 65 þúsund kr. á mánuði. Með þessu vill Arion banki koma til móts við viðskiptavini sína sem skulda erlend íbúðalán þar til fordæmisgefandi hæstaréttardómar falla um lán bankans.

Í ljósi þeirrar óvissu sem nú ríkir vegna erlendra lána hefur Arion banki enn fremur ákveðið að framlengja lausnir sínar vegna erlendra lána um tvo mánuði eða til 1. september 2010. Þá ítrekar bankinn að viðskiptavinir glata ekki betri rétti þó þeir nýti sér úrræði bankans. Bankinn áréttar einnig að engar nauðungarsölur á íbúðahúsnæði verða á vegum bankans á þessu ári.

Hægt er að sækja um framangreindar breytingar á mánaðarlegum afborgunum erlendra íbúðalána í útibúum bankans og taka þær gildi frá og með næsta gjalddaga.

Arion banki vonar að þetta bráðabirgðaúrræði nýtist viðskiptavinum með erlend íbúðalán þar til úr allri óvissu verður skorið. Bankinn vonar að niðurstaða fáist sem allra fyrst og biðst velvirðingar á þeim óþægindum sem þessi staða hefur valdið.