Enn svigrúm til vaxtalækkana: Spáum 75 punkta lækkun á næsta fundi

Enn svigrúm til vaxtalækkana: Spáum 75 punkta lækkun á næsta fundi

Jákvæðar verðbólguhorfur munu skapa áframhaldandi svigrúm til vaxtalækkana á næstu vaxtafundum Seðlabankans að mati Greiningardeildar. Verðbólgan hefur gengið hraðar niður en Seðlabankinn spáði fyrir um og útlit fyrir að slakinn í hagkerfinu verði meiri. Þá hefur Seðlabankinn breytt um tón hvað varðar tímasetningar um afnám gjaldeyrishafta og virðist flest benda til þess að þau vari um allangt skeið. Í ljósi þessa teljum við að áherslur Peningstefnunefndar liggi nú fyrst og fremst í mikilvægi þess að ná raunvöxtum niður samhliða hjaðnandi verðbólgu eins og Seðlabankastjóri hefur imprað á (sjá umfjöllun að neðan).

Það liggur nú fyrir að Seðlabankinn var of seinn að nýta sér höftin til þess að lækka vexti og vega þannig á móti gríðarlegum samdrætti í landsframleiðslu. Vaxtastig hefði átt að vera komið á þann stað þar sem það er nú fyrir ári síðan til þess að gefa peningalegum slaka færi á því að vinna á móti kreppunni. Eins og nú er komið málum á Íslandi skiptir það ekki höfuðmáli hvort verðbólga sé einu prósentustigi meiri eða minni en eitt auka prósentustig í hagvexti er eins og vatn í eyðimörk. Þessi glöp hljóta nú að vera meðlimum Peningastefnunefndarinnar ljós enda liggur nú fyrir að nokkuð er til þess að forsendur geti skapast fyrir afnámi hafta.

Allir nefndarmenn studdu tillögu Seðlabankastjóra um 75 punkta vaxtalækkun á síðasta fundi Peningastefnunefndar þann 3. nóvember sl. Að okkar mati er fátt í spilunum nú sem rökstyður minni skref en á þeim fundi. Í ljósi þess hversu lágir vextir eru nú þegar teljum við þó meiri líkur á því að Seðlabankinn haldi svipuðum takti á næsta fundi líkt og verið hefur á síðustu fundum. Því spáum við 75 punkta lækkun 8.desember næstkomandi. Gangi spá okkar eftir verða vextir á viðskiptareikningum innlánastofnana 3,25%, hámarksvextir 28 daga innistæðubréfa 4,5% og veðlánavextir 4,75%. Greiningardeild gerir jafnframt ráð fyrir því að vaxtalækkunarferlið haldi áfram á nýju ári en með hægari hraða.

Sjá umfjöllun í heild: