Arion banki at­kvæða­mest­ur í hluta­bréf­um og skulda­bréf­um

Arion banki var með mestu hlutdeild kauphallaraðila í október, bæði í hlutabréfum og skuldabréfum. Þetta kemur fram í gögnum frá Nasdaq Iceland. Það hefur ekki gerst síðan í febrúar 2019 að sami aðilinn sé veltuhæstur í báðum flokkum verðbréfa en þá náði bankinn einnig þeim árangri.

Um er að ræða öll viðskipti í kauphöllinni sem framkvæmd eru af markaðsviðskiptum Arion banka undir auðkenni bankans fyrir hönd viðskiptavina eða eigin viðskipta bankans.

Í hlutabréfaviðskiptum á aðallista var hlutdeild Arion banka í október samtals 26,3%. Það sem af er ári er hlutdeild bankans 22,1% og er bankinn þar fremstur meðal markaðsaðila og hefur verið það í átta mánuði af þeim tíu sem liðnir eru af árinu. Á eftir koma Íslandsbanki, Kvika banki og Fossar markaðir í þessari röð.

Í viðskiptum með skuldabréf var hlutdeild Arion banka 19,4% í október sem er hæsta markaðshlutdeild bankans á þessu ári. Það sem af er ári er Arion banki í þriðja sæti með 16,3% hlutdeild í skuldabréfaviðskiptum á eftir Kviku banka og Íslandsbanka.