11.07.2017
Arion banki er besti bankinn að mati Euromoney
Alþjóðlega fjármálatímaritið Euromoney hefur valið Arion banka besta bankann á Íslandi. Arion banki hlýtur því viðurkenninguna Euromoney's Awards for Excellence en niðurstaðan var tilkynnt við hátíðlega athöfn í Tower of London í síðustu viku.
Í niðurstöðu dómnefndar segir meðal annars að Arion banki hafi náð lengst íslenskra banka hvað varðar góðan rekstur og endurspegli best árangur íslensks efnahagslífs á undanförnum árum. Bent er á að árið 2010 hafi aðeins 25 prósent útlána verið til einstaklinga en árið 2016 hafi það hlutfall verið komið í 47 prósent. Á sama tíma fóru lán í vanskilum frá því að vera rúmlega helmingur af lánasafni bankans niður í 1,6 prósent. Þá var einnig litið til endurskipulagningar bankans á borð við sölu eigna og skráningu félaga á markað auk öflugrar starfsemi Valitor, Stefnis og Varðar sem allt eru dótturfélög Arion banka.
Verðlaunin eru ekki bara staðfesting á góðum árangri Arion banka á síðustu misserum og árum heldur einnig hvatning til áframhaldandi góðra verka. Við hjá Arion banka munum áfram leggja áherslu á faglega ráðgjöf og aðgengi að stafrænum lausnum. Þannig veitum við þægilegri bankaþjónustu fyrir framtíðina.
Um Euromoney:
Euromoney hefur fjallað um málefni fjármálageirans í hátt í 50 ár. Verðlaunin Euromoney's Awards for Excellence hafa verið veitt frá árinu 1992 og voru þá fyrst sinnar tegundar. Árið 2017 bárust 1.500 tilnefningar en veitt voru um 170 verðlaun á heims-, svæðis- og landsvísu.
Deila grein:
