Arion banki er fyrir­mynd­ar­fyrir­tæki í góð­um stjórnar­hátt­um

Rannsóknarmiðstöð um stjórnarhætti við Háskóla Íslands veitti í gær Arion banka viðurkenningu fyrir að vera fyrirmyndarfyrirtæki í góðum stjórnarháttum. Viðurkenningin var veitt að undangengnu formlegu mati á stjórnarháttum bankans sem unnin var af viðurkenndum úttektaraðila í febrúar 2019. Höskuldur H. Ólafsson, bankastjóri Arion banka, veitti viðurkenningunni móttöku en afhendingin var hluti af árlegri ráðstefnu um góða stjórnarhætti. Höskuldur var jafnframt með erindi á ráðstefnunni í gær en þema ráðstefnunnar í ár var hæfni og hæfi stjórnarmanna.

Arion banki fékk fyrst viðurkenningu fyrir góða stjórnarhætti árið 2015 að undangengnu formlegu mati sem gilti í þrjú ár. Matið á góðum stjórnarháttum sem framkvæmt var í ár byggir líkt og áður á leiðbeiningum um stjórnarhætti fyrirtækja sem Viðskiptaráð Íslands, Samtök atvinnulífsins og Nasdaq Iceland gefa út og gildir sömuleiðis í þrjú ár.

Tilgangur ráðstefnunnar um góða stjórnarhætti er að vekja athygli á mikilvægi góðra stjórnarhátta, alþjóðlegum straumum og stefnum í stjórnarháttum og vinnu íslenskra stjórnarmanna við að efla stjórnarhætti. Viðurkenningin er mikilvæg staðfesting á því að bankinn ástundi góða og vandaða stjórnarhætti.