Arion banki er stolt­ur bak­hjarl Nordic Health Hackat­hon

Nordic Health Hackathon er viðskipta- og forritunarkeppni þar sem bæði íslensk og alþjóðleg teymi keppast við að búa til lausnir sem tengjast heilsu. Norðurlöndin búa almennt við gott aðgengi að heilbrigðiskerfi og gæði þess eru mikil á alþjóðavísu. Markmið keppninnar er að þátttakendur þrói notendavænar lausnir sem stuðla að bættri heilsu og lífsgæðum. Keppnin mun fara fram í Háskólanum í Reykjavík 22.-24. mars 2019.

Stuðningur Arion banka við keppnina felst í því að þátttakendur munu hafa aðgang að forritunarviðmóti (API) þar sem færslur (tilbúinna) einstaklinga verða gerðar aðgengilegar. Færslurnar eru flokkaðar eftir fyrirfram skilgreindum þáttum af Meniga, til dæmis húsaleigu, samgöngum, matarinnkaupum, veitingahúsum, ferðalögum o.s.frv. Markmiðið er að þátttakendur geti nýtt sér þessi fjárhagslegu gögn í samhengi við heilsufarstengdar upplýsingar til að þróa lausnir sem stuðla að auknum lífsgæðum notenda.

Arion banki mun veita peningaverðlaun fyrir tvær bestu lausnirnar á þessu sviði, annars vegar 350 þúsund krónur og hins vegar 150 þúsund krónur. Verðlaun verða veitt teymum sem sýna framúrskarandi notkun á fjárhagslegum gögnum til að stuðla að betra lífi notenda.

Arion banki hefur verið leiðandi á íslenskum bankamarkaði þegar kemur að nýsköpun. Frá árinu 2012 hefur bankinn staðið fyrir viðskiptahraðlinum Startup Reykjavik og fjárfest í um 70 íslenskum sprotafyrirtækjum sem hafa hlotið inngöngu í hraðalinn. Árið 2016 var bankinn fyrstur íslenskra fjármálafyrirtækja til að standa fyrir hakkaþoni þar sem þátttakendur þróuðu nýjar fjármálalausnir. Frá sama ári hefur þróun nýrra vara og þjónustu farið fram í innri viðskiptahraðli bankans þar sem nær 20 nýjar vörur og þjónustuleiðir hafa litið dagsins ljós, þ.m.t. þróun apps Arion banka sem er að mati Íslendinga besta bankaapp á Íslandi skv. könnun MMR.

Nánari upplýsingar um keppnina má finna á vefsíðu NHH. Hægt er að lesa meira um stafræna þróun hjá Arion banka hér.