05.07.2018
Arion banki fær hæstu einkunn fyrir jafnréttismál
Arion banki skorar hæst allra skráðra fyrirtækja á Íslandi þegar kemur að jafnrétti samkvæmt vísitölu fyrirtækisins Gemmaq en bankinn fær þar fullt hús stiga. Bankinn skorar jafnframt hæst í samanburði við önnur fyrirtæki á markaði á Norðurlöndunum (Nasdaq Nordic og Oslo Börs).
Gemmaq kvarðinn mælir kynjahlutföll í framkvæmdastjórnum og stjórnum meðal skráðra félaga á alþjóðamörkuðum. Gemmaq hefur mælt öll félög á íslenskum hlutabréfamarkaði sem eru að meðaltali með einkunnina 7 en Arion banki er hæstur með einkunnina 10.
Um aðferðafræðina
Einkunnir eru gefnar á skalanum 1-10 þar sem 10 merkir jöfn kynjahlutföll, þar sem framkvæmdastjórn og stjórn hafa jafnt vægi í útreikningnum fyrir hvert félag. Staða forstjóra og stjórnarformanns reiknast inn í meðaleinkunn fyrirtækis þegar það er kona sem gegnir stöðunni, annars ekki. Að því leyti má segja að kvarðinn mæli raunveruleg áhrif kvenna á mörkuðum.
Gemmaq er nýsköpunarfyrirtæki sem Freyja Þórarinsdóttir stofnaði árið 2015 þegar hún var nemi í Columbia háskólanum í Bandaríkjunum. Fyrirtækið hefur meðal annars hlotið styrk frá velferðarráðuneytinu fyrir þróun á mælikvörðum um jafnrétti. Markmið fyrirtækisins er að safna upplýsingum fyrir markaðsaðila um kynjahlutföll hjá skráðum fyrirtækjum og hjálpa þannig til við að útrýma kynbundnu valdaójafnrétti.
Deila grein:
