Ari­on banki ger­ir hlé á veit­ingu verð­tryggðra íbúðalána

Hæstiréttur kvað nýverið upp dóm í máli sem höfðað var gegn Íslandsbanka þar sem skilmálar óverðtryggðs láns, sem kveða á um heimildir til að breyta vöxtum, voru að hluta til dæmdir ólögmætir. Niðurstaða dómsins felur í sér að heimilt er að breyta vöxtum sambærilegra lána í takt við breytingar á stýrivöxtum Seðlabanka Íslands.

Óvissa hvað varðar lögmæti skilmála verðtryggðra lána

Skilmálar íbúðalána Arion banka með breytilega vexti eru frábrugðnir þeim sem fjallað var um í dómi Hæstaréttar. Mál sem snýr að láni Arion banka með breytilegum verðtryggðum vöxtum bíður málflutnings fyrir Hæstarétti en Landsréttur dæmdi bankanum í vil í febrúar síðastliðnum. Enn fremur vísa vaxtabreytingarskilmálar lána Arion banka með verðtryggðum vöxtum eðli málsins samkvæmt ekki til stýrivaxta Seðlabankans. Því er enn óvissa hvað varðar lögmæti skilmála verðtryggðra lána sem kveða á um breytingar á vöxtum.

Af þeim sökum gerir Arion banki hlé á veitingu verðtryggðra lána, hvort sem þau eru með breytilegum eða föstum vöxtum. Við metum nú hvort hægt sé að bjóða bráðabirgðalausn þar til óvissu um lögmæti skilmálanna hefur verið eytt.

Óverðtryggð lán áfram í boði – kynntu þér greiðslufestu

Áfram verða óverðtryggð íbúðalán í boði. Jafnframt býður Arion banki viðskiptavinum sem kjósa óverðtryggð lán en vilja lækka greiðslubyrði upp á greiðslufestu. Þegar greiðslufesta er sett á óverðtryggt lán þá er föst fjárhæð greidd í tólf mánuði, sem er lægri en mánaðarleg greiðsla samkvæmt skilmálum lánsins. Mismunurinn er lagður við höfuðstól lánsins, sem leiðir til hækkunar lánsins. Hægt er að velja hvort fasta mánaðarlega greiðslan miðist við 1, 2, 3 eða 4% lægri vexti en lánið ber í dag. Nánar má lesa um greiðslufestu hér.

Hafðu samband

Við bendum öllum þeim sem eru í fasteignahugleiðingum að setja sig í samband við okkur, í síma 444 7000, á ibudalan@arionbanki.is eða í gegnum netspjallið á vefsíðu okkar til að ræða þá kosti sem í boði eru.