Arion banki til­nefnd­ur til verð­laun­anna markaðs­fyrir­tæki ársins 2018

Arion banki hefur verið tilnefndur til verðlaunanna markaðsfyrirtæki ársins 2018 sem veitt eru af ÍMARK.

Markaðsverðlaun ÍMARK falla í skaut því fyrirtæki sem dómnefnd telur að hafi náð framúrskarandi árangri í markaðsmálum undanfarin tvö ár og sannað þykir að sýnilegur árangur hafi náðst. Val dómnefndar byggir á ítarlegu ferli þar sem lagt er mat á fagmennsku við markaðsstarfið, árangur og að fjárhagslegt öryggi sé til staðar.

Fjögur fyrirtæki eru tilnefnd til verðlaunanna að þessu sinni: Arion banki, Dominos, NOVA og Nox medical. Tilkynnt verður um sigurvegara verðlaunanna á Hilton Reykjavík Nordica þann 13. desember nk. og mun frú Eliza Jean Reid afhenda verðlaunin.

ÍMARK hefur veitt Markaðsverðlaunin frá árinu 1991 en þetta er í 26. skipti sem verðlaunin eru veitt. Markmið verðlaunanna er að stuðla að aukinni fagmennsku í markaðsstarfi íslenskra fyrirtækja.