05.12.2023
Arion er banki ársins að mati The Banker – þriðja árið í röð
Hið virta fjármálatímarit, The Banker, sem gefið er út af The Financial Times, hefur valið Arion sem banka ársins á Íslandi árið 2023. Er þetta þriðja árið í röð sem Arion banki hlýtur nafnbótina.
Í rökstuðningi sínum vísar The Banker til forystu Arion hér á landi sem feli í sér sóknarfæri til frekari vaxtar á norðurslóðum. Einnig er bent á víðtæka þekkingu og samlegð á sviði fyrirtækjaþjónustu og -ráðgjafar, markaða og sjóðastýringar í gegnum dótturfélagið Stefni. Þessir þættir feli í sér að bankinn sé vel í stakk búinn að grípa tækifæri á norðurslóðum og þá ekki aðeins á sviði lánveitinga og fyrirtækjaráðgjafar.
The Banker nefnir jafnframt áframhaldandi stafvæðingu þjónustunnar og áherslu bankans á að hún sé einföld og þægileg frá upphafi til enda. Vísað er til bílalána þar sem rafrænar þinglýsingar eru nú hluti af lánaferlinu sem tekur viðskiptavini aðeins nokkrar mínútur að fara í gegnum.
Deila grein:
