Dótt­ur­félag Bláa Lónsins og Arion banki undir­rita láns­samning vegna upp­byggingar í Þjórsár­dal

Rauðukambar ehf., dótturfélag Bláa Lónsins hf., hafa undirritað lánssamning við Arion banka um fjármögnun áframhaldandi uppbyggingar í Þjórsárdal. Verkefnið nær meðal annars til Fjallabaðanna, hótelsins Mountain Retreat í Rauðukömbum, Gestastofu Þjórsárdals auk smáhýsa og tjaldsvæðis við Selhöfða. Um er að ræða eina umfangsmestu fjárfestingu sem í hefur verið ráðist í íslenskri ferðaþjónustu.

Þjórsárdalur er eitt merkasta náttúru- og sögusvæði Íslands. Uppbyggingin byggir á langtímasýn um að auka aðgengi að náttúru og sögu dalsins og styrkja hann sem heildstæðan áfangastað, með virðingu fyrir sérstöðu svæðisins að leiðarljósi.

Uppbyggingin mun skapa fjölbreytta möguleika til afþreyingar í Þjórsárdal. Gestastofa Þjórsárdals verður miðstöð fræðslu, með gagnvirkri sýningu og upplýsingamiðstöð þar sem náttúru og sögu svæðisins verða gerð skil.

Benedikt Gíslason bankastjóri Arion banka og Sigríður Margrét Oddsdóttir forstjóri Bláa lónsins við undirritun. Aftari röð: Margrét Ingþórsdóttir viðskiptastjóri á fyrirtækjasviði Arion banka, Hákon Hrafn Gröndal framkvæmdastjóri fyrirtækja- og fjárfestingabankasviðs Arion banka, Guðmunda Ósk Kristjánsdóttir forstöðumaður á fyrirtækjasviði Arion banka og Helgi Júlíusson framkvæmdastjóri fjármálasviðs Bláa lónsins.