09.06.2020
Efnahagshorfur 2020-2022: Brotist í gegnum kófið
Þau áhrif sem COVID-19 hefur haft, og mun hafa, á íslenskt efnahagslíf þarf ekki að tíunda. Spurningin sem við stöndum frammi fyrir er ekki hvort, heldur hversu mikið er hagkerfið dragast saman. Spá Arion banka gerir ráð fyrir 8,2% samdrætti árið 2020. Utanríkisverslun spilar lykilhlutverk í samdrættinum, enda hafa stærstu útflutningsgreinarnar beðið skipbrots. Þá vegur samdráttur einkaneyslu og fjárfestingar þungt á meðan hið opinbera vinnur á móti samdrættinum í gegnum samneyslu og fjárfestingu.
Þó atvinnuleysi hafi náð nýjum hæðum, ferðaþjónustan sé í sárum og innlend eftirspurn ekki svipur hjá sjón er ýmislegt sem bendir til þess að samdrátturinn verði djúpur en skammvinnur og að hagkerfið taki við sér á næsta ári. Óvissuna þarf hins vegar ekki að kynna fyrir neinum og getur hæglega brugðið til beggja vona. Gert er ráð fyrir að fjárfestingarstigið gefið eftir í ár og á því næsta, þróun sem bæði má rekja til atvinnuvegafjárfestingar og íbúðafjárfestingar. Vegna slaka á húsnæðismarkaði og tiltölulega stöðugrar krónu er útlit fyrir að verðbólgan stoppi stutt yfir verðbólgumarkmiði og dvelji undir 2% stóran hluta næsta árs, þrátt fyrir áframhaldandi launahækkanir.
Aðgerðir ríkisstjórnarinnar og Seðlabankans eru til þess fallnar að milda efnahagshöggið og styðja hagkerfið við að ná vopnum sínum á ný. Þá býr hagkerfið að góðum árangri í baráttunni gegn COVID-19, tiltölulega hagstæðri skuldastöðu bæði í opinbera- og einkageiranum og sögulega góðri erlendri stöðu. Búið er að losa um mikið magn fjármuna, nú þarf að koma þeim í vinnu og smyrja hjól atvinnulífsins.
Deila grein:
