17.03.2021
Efnahagshorfur 2021-2023: Jafnan er dimmast undir dögun
Ný hagspá Arion banka fyrir árin 2021-2023 var kynnt í dag. Eftir fordæmalausan varnarsigur á síðasta ári, þegar íslenskt hagkerfi fór langt fram úr væntingum greiningaraðila og dróst aðeins saman um 6,6%, er gert ráð fyrir hægfara efnahagsbata í ár. Spáð er 3,3% hagvexti, sem er engu að síður ívið meiri vöxtur en áður var talið, sem er drifinn áfram af einkaneyslu, þjónustuútflutningi í gegnum ferðamennsku og aukinni fjárfestingu. Viðsnúnings í ferðaþjónustu mun þó varla gæta að ráði fyrr en á seinni hluta þessa árs. Hagkerfið á því langan veg fyrir höndum en talið er að það blási byrlega í segl þjóðarskútunnar á næsta ári samhliða auknum ferðamannafjölda.
Þrátt fyrir mikið atvinnuleysi í sögulega samhengi er einkaneyslan í kjörstöðu til að snúa vörn í sókn. Útlit er fyrir áframhaldandi raunlaunahækkunum, óbreyttum stýrivöxtum fram á næsta ár og fasteignaverðshækkunum í takt við söguleg meðaltal. Fasteignaliðurinn mun því ýta undir verðbólguþrýsting en á móti vegur gengisstyrking krónunnar samhliða auknum ferðamannafjölda. Verðbólga er því spáð við verðbólgumarkmið strax á næsta ári. Teikn eru á lofti um að fjárfesting sé tekin að glæðast sem eru sérstaklega jákvæð tíðindi fyrir hagkerfið þar sem fjárfesting, sérstaklega atvinnuveganna, er undirstaða verðmætasköpunar framtíðarinnar.
Deila grein:
