Einar Pálmi nýr for­stöðu­maður fyrir­tækja­ráð­gjaf­ar Arion

Einar Pálmi Sigmundsson hefur tekið við starfi forstöðumanns fyrirtækjaráðgjafar Arion banka. Einar Pálmi er reynslumikill sérfræðingur á sviði fjármála og viðskipta með yfirgripsmikla þekkingu á atvinnulífinu, fjárfestingum og kaupum og sölum á fyrirtækjum.

Einar Pálmi hefur yfir 30 ára reynslu af fjármálamarkaði. Hann var fjárfestingarstjóri Kviku eignastýringar á árunum 2017 til 2024 en starfaði áður hjá HF Verðbréfum, Arion banka, Kaupþingi og Íslandsbanka, þar sem hann starfaði í tæp 15 ár. Einar Pálmi hefur setið í ýmsum stjórnum þar á meðal stjórnum Arctic Adventures, Fálkanum, Já, Gallup, Rarik og Íslenska gámafélaginu.

Einar Pálmi er viðskiptafræðingur frá Háskóla Íslands, með MBA-gráðu frá Rotterdam School of Management og með próf í verðbréfaviðskiptum. Hann er jafnframt með ACI Diploma í fjárstýringu og gjaldeyrisviðskiptum.