Frá­bær þátt­taka í Fjár­festingar­keppni há­skól­anna

Góð þátttaka var í Fjárfestingarkeppni háskólanna sem Arion banki hélt í samstarfi við Dyngju. Í keppninni fá háskólanemendur um allt land að spreyta sig á fjárfestingum án þess að taka nokkra raunverulega fjárhagslega áhættu.

Sem fyrr fór keppnin fram í gegnum Dyngju appið þar sem þátttakendur fá tíu milljón sýndarveruleikakrónur til að nýta í fjárfestingar. Keppendur geta átt viðskipti með sjóði Stefnis og öll þau hlutabréf sem skráð eru á aðalmarkað Nasdaq á Íslandi.

Keppnin fór fram dagana 14. október - 11. nóvember. Þá var einnig efnt til bónusviku dagana 12.-16. nóvember vegna mikils áhuga. (Sjá frekari upplýsingar um bónusvikuna.)

Íþróttafólk og verðbréfamiðlarar oft með svipaða skapgerð

Martin Bjarni Guðmundsson bar sigur úr býtum í aðalkeppninni. Hann stundar BS-nám í hagfræði og fjármálum við Háskóla Reykjavíkur.

Hvert er lykillinn að þessum góða árangri?

„Bara. Ég fylgdist vel með markaðnum og sótti 1-2% hér og þar, nýtti mér hækkanir og flökt á verði ...“

Ætlarðu að leggja þetta fyrir þig í framtíðinni?

„Ég ætla í löggildingu hjá verðbréfamiðlara nú í desember. Klára verðbréfamiðlarann, leita mér svo að vinnu eftir útskrift og öðlast reynslu. Það er stefnan. Síðan sé ég til hvort ég fari í meistaranám hér heima eða úti þegar fram líða stundir.“

Hvar sérðu þig fyrir þér eftir tíu ár?

„Vonandi í einhverri sjóðsstýringu!“

Martin Bjarni er á fullu í fimleikum meðfram háskólanáminu og stundar íþróttirnar af kappi í herbúðum Gerplu. Hann segist greina vissan þráð í skapgerð íþróttafólks og þeirra sem sækja í að starfa á verðbréfamarkaði.

„Já, það er þetta keppnisumhverfi. Þú þarft keppnisskap til að skara fram úr og gera vel.“

Nöfn sigurvegara í bónusviku: 1. sæti Ólafur Helgi Örvarsson (HÍ), 2. sæti Gauti Steinþórsson (HR) og 3. sæti Kristófer Ingi Kristinsson (HA).

Um Fjárfestingarkeppni háskólanna

Markmiðið með Fjárfestingarkeppni háskólanna er að efla fræðslu um fjármál og fjárfestingar og gera nemendum kleift að kljást við raunveruleg verkefni úr atvinnulífinu. Arion banki hvetur nemendur til að skoða fræðsluefnið sem má finna í Dyngju appinu en þar er farið yfir helstu atriði og hugtök tengd fjárfestingum.

Um Dyngju

Dyngja er spegilmynd íslensks fjármálamarkaðar. Þar má eiga viðskipti með hlutabréf skráð á aðalmarkað Nasdaq á Íslandi. Gögn miðast við kaup- og sölugengi á raunmarkaði. Sækja má Dyngju appið í App Store eða Play Store.

Nöfnin á eigendum Dyngju appsins: Alexander Sigurðarson, Reynir Freyr Hauksson, Magnús Benediktsson og Fannar Logi Hannesson sem var fjarverandi í verðlaunaafhendingu.