Fyrir­tækið Dyngja var val­ið fyrir­tæki ársins 2020 í keppni Ungra frum­kvöðla

Fyrirtækið Dyngja, sem er í eigu nemenda við Verslunarskóla Íslands, var valið fyrirtæki ársins 2020 í samkeppni Ungra frumkvöðla, Junior Achievement á Íslandi sem fram fór í síðustu viku. Fyrirtækið mun keppa fyrir hönd Íslands í Evrópukeppni Ungra frumkvöðla sem fram fer í Cascais í Portúgal dagana 22.-24. júlí 2020. Vegna COVID-19 ástandsins verður keppnin haldin með óhefðbundnu sniði í ár og fer fram með rafrænum hætti.

Tuttugu og fimm fyrirtæki frá fimmtán framhaldsskólum voru valin úr hópi 109 fyrirtækja til að taka þátt í úrslitum Ungra frumkvöðla 2020.

Eftirfarandi fyrirtæki hlutu verðlaun:

• Fyrirtæki ársins 2020: Dyngja - Verslunarskóli Íslands

• Fyrirtæki ársins - 2. sæti: Piskís - Verslunarskóli Íslands

• Fyrirtæki ársins - 3. sæti: Draumaljós - Fjölbrautaskólinn í Garðabæ

• Mesta nýsköpunin: Skín - Kvennaskólinn í Reykjavík

• Besta fjármálalausnin: Dyngja - Verslunarskóli Íslands

• Besti Sjó-Bisnessinn: Hulur - Borgarholtsskóli

• Samfélagsleg nýsköpun: Rætur - Verslunarskóli Íslands

• Besta hönnunin: Kusari - Menntaskólinn við Sund

• Besta tæknilausnin: iQroll - Framhaldsskólinn í Vestmannaeyjum

• Umhverfisvænasta lausnin: Vösk - Verslunarskóli Íslands

• Bestu markaðsmálin: Koley - Menntaskólinn við Sund

• Besta matvælafyrirtækið: MYSEY - Fjölbrautaskólinn í Garðabæ

Arion banki er einn af aðalbakhjörlum Ungra frumkvöðla, Junior Achievement á Íslandi. Samtökin hafa það hlutverk að búa ungt fólk undir framtíðina og auka færni þess til atvinnuþátttöku og atvinnusköpunar með því að stuðla að aukinni nýsköpunar-, frumkvöðla- og viðskiptamenntun í framhaldsskólum. Þannig er frumkvöðlastarf kynnt fyrir framhaldsskólanemum með það að markmiði að efla frumkvöðlaanda meðal ungmenna og þjálfa frumkvöðla framtíðarinnar.