29.10.2018
Hagspá fyrir árin 2018-2021: Sett í lága drifið
Greiningardeild Arion banka kynnti í dag nýja hagspá fyrir árin 2018-2021, undir yfirskriftinni Sett í lága drifið. Þar kom meðal annars fram að eftir sterkan fyrri árshelming 2018 sé útlit fyrir að hagkerfið snöggkólni. Reiknað er með að hratt hægi á hagvexti og að hann verði 1,3% á næsta ári. Sem fyrr muni einkaneysla og fjárfesting draga vagninn, á meðan utanríkisverslun leggi sömuleiðis sitt af mörkum.
Í hagspánni kemur fram að óvissan um efnahagshorfur hafi aukist að undanförnu og hafi það endurspeglast í snarpri gengisveikingu, stígandi verðbólguvæntingum og aukinni svartsýni. Helstu áhættuþættir um þessar mundir eru, að mati Greiningardeildarinnar, spenna á vinnumarkaði og staða ferðaþjónustunnar. Spáð er launahækkunum umfram það sem samrýmist verðstöðugleika og lítilsháttar vexti í komum ferðamanna. Þrátt fyrir spá um minniháttar gengisstyrkingu á næsta ári spáir Greiningardeildin því að krónan muni veikjast eftir því sem líður á spátímann og að verðbólga verði yfir verðbólgumarkmiðum Seðlabankans.
Deila grein:
