Ís­lenska hag­kerfið stíg­ur öld­un­a: Efna­hags­horf­ur 2025-2028

Ný efnahagsspá Arion banka gerir ráð fyrir að þjóðarskútan haldi til hafs á ný eftir samdrátt síðasta árs. Innlend eftirspurn, með einkaneysluna í broddi fylkingar, hefur verið atkvæðameiri en áður var reiknað með og mun halda sínu hlutverki sem driffjöður hagvaxtar. Jafnvel þó verulegur innflutningur í tengslum við gagnaver og uppbyggingu landeldis eigi stóran þátt í neikvæðu framlagi utanríkisverslunar í ár, liggur í augum uppi að útflutningshorfurnar hafa síst batnað; flugframboð til landsins hefur dregist snarpt saman, krónan er sterk og áfram er mikil óvissa um efnahagsstefnu stærstu hagkerfa heims.

Á næsta ári er útlit fyrir að innflutningur dragist saman, sem skýrist fyrst og fremst af minni fjárfestingu áðurnefndra gagnavera, og að utanríkisverslun leggist á sveif með einkaneyslunni. Þó útlit sé fyrir að einkaneyslan verði dráttarklár hagvaxtar út spátímann eru horfurnar þokukenndari en oft áður, þar sem verðbólgan hefur reynst treg í taumi og vextir því haldist háir lengur en áður var spáð. Áhrif þessa á innlenda eftirspurn eru ekki enn komin fram að fullu, en sýnileg merki kólnunar er að finna bæði á vinnumarkaði og húsnæðismarkaði.

Við væntum þess að áhrif þétts taumhalds peningastefnunnar komi enn skýrar fram á næsta ári, í auknu atvinnuleysi og raunverðslækkunum á húsnæðismarkaði. Fátt er svo með öllu illt, að ekki boði nokkuð gott þar sem aukið atvinnuleysi dregur að öðru óbreyttu úr verðbólguþrýstingi. Þrátt fyrir að verðbólgan verði yfir verðbólgumarkmiði út spátímann eigum við von á tveimur vaxtalækkunum á næsta ári og að vextir verði komnir í 6,25% undir blálok spátímans. Krónan, sem er mjög sterk um þessar mundir, gæti hins vegar lagt stein í götu verðhjöðnunar taki hún að veikjast verulega, en í þessari spá er gert ráð fyrir hógværri veikingu frá og með næsta ári.

Eins og ávallt er óvissan mikil, ekki síst í alþjóðamálum en ekki eru öll kurl komin til grafar varðandi vaxandi verndarstefnu í alþjóðaviðskiptum. Hvernig sem fer teljum við að þjóðarskútan sé vel í stakk búin til að sigla milli skers og báru í úfnum sjó.

Íslenska hagkerfið stígur ölduna: Efnahagshorfur 2025-2028

Íslenskur sjávarútvegur í heimsklassa

Sjávarútvegur hefur verið samofinn hagsögu Íslands frá landnámi og staðið af sér ýmiss áföll, aðlagast breyttum aðstæðum og haldist samkeppnishæfur þrátt fyrir misgóðar aðstæður.

Í skýrslu Arion Greiningar um sjávarútveginn fjöllum við um hvernig kvótakerfið hefur skapað umgjörð sem hefur gert íslenskum sjávarútvegsfélögum kleift að komast í fararbrodd á heimsvísu. Við skoðum rekstur og rekstrarskilyrði, og greinum áhrif nýs fiskveiðigjalds. Þá köfum við ofan í hraðan vöxt og stórtækar áætlanir í fiskeldi.

Ef framtíðin rímar við fortíðina eru allar líkur á því að fyrirtækjunum takist það sem fyrr að tækla nýjar áskoranir, aðlagast breyttum aðstæðum og finna leiðir til þess að halda Íslenskum sjávarútvegi í fararbroddi.

Íslenskur sjávarútvegur í heimsklassa