06.01.2017
Kynning á Fyrirtækjaverkefni Ungra frumkvöðla
Þann 10. janúar 2017 verður Fyrirtækjaverkefni Ungra frumkvöðla 2017 (Junior Achievement á Íslandi) formlega ýtt úr vör með kynningarviðburði í Háskólanum í Reykjavík. Hörður Arnarson, forstjóri Landsvirkjunar og stjórnarformaður Ungra frumkvöðla, Ari Kristinn Jónsson, rektor Háskólans í Reykjavík, Þór Sigfússon, stofnandi sjávarklasans, Einar Gunnar Guðmundsson frá Arion banka, og Sveinn Ólafur Lúðvíksson frá Sölva Chocolates halda stutt erindi. Arion banki er einn af aðalbakhjörlum verkefnisins.
Sölva Chocolates (www.solvachocolates.com) vann samkeppni Ungra frumkvöðla um fyrirtæki ársins 2016. Sölva Chocolates tók þátt í Startup Reykjavík á árinu 2016 og er nú í fullum rekstri í Kópavogi. Fyrirtækið tók þátt í Evrópukeppni Ungra frumkvöðla sem fram fór í Sviss í júlí á síðasta ári og hreppti þar samfélagsmiðlaverðlaun. Saga Sölva Chocolates er gott dæmi um það hvernig Fyrirtækjaverkefni Ungra frumkvöðla veitir nemendum dýrmæta reynslu við stofnun nýrra fyrirtækja sem nýtist þegar út í raunveruleikann er komið.
Reiknað er með að um um 500 nemendur í um helmingi íslenskra framhaldsskóla muni taka þátt í Fyrirtækjaverkefni Ungra frumkvöðla árið 2017. Í verkefninu stofna nemendur sín eigin smáfyrirtæki og fá reynslu af frumkvöðlastarfi. Á vefsíðunni www.ungirfrumkvodlar.is, má finna frekari upplýsingar um verkefnið og þá skóla sem taka þátt í því ár. Í samstarfi við sjávarklasann verða ungir frumkvöðlar sérstaklega hvattir til að koma með hugmyndir um nýsköpun sem tengist hafinu en að sjálfsögðu er opið fyrir allar nýsköpunarhugmyndir.
Áhugasamir eru velkomnir á kynningarfundinn sem fram fer eins og áður segir Í Háskólanum í Reykjavík, þriðjudaginn 10. janúar kl. 17.00-18.00.
Deila grein:
