Ný hagspá Arion banka

Ný hagspá Arion banka var birt í dag. Spáin gerir ráð fyrir 6% hagvexti árið 2022, sem er nokkuð meiri vöxtur en gert var ráð fyrir í síðustu spá, þökk sé kröftugri einkaneyslu, hröðum bata ferðaþjónustunnar og vaxandi fjárfestingu.

Það syrtir í álinn á næsta ári sökum versnandi alþjóðlegra efnahagshorfa, sem endurspeglast í minni hagvexti hér á landi en áður var talið. Fjárfesting gefur eftir og það hægir á eftirspurnarvexti, bæði innanlands sem og eftirspurn eftir íslenskum útflutningsafurðum. Sérstaklega stendur ferðaþjónustan frammi fyrir krefjandi vetri þar sem yfirvofandi efnahagsþrengingar í Evrópu og hækkandi flugfargjöld gætu dregið úr eftirspurn eftir Íslandsferðum. Ísland býr þó að þeim kostum að auðvelt er að komast til landsins, sem er það öruggasta í heimi. Ferðamannaspáin gerir þar af leiðandi ráð fyrir áframhaldandi vexti í komum ferðamanna til landsins, þó nokkuð hægi á sökum versnandi efnahagshorfa á okkar helstu markaðssvæðum. Búist er við að 1.900 þúsund ferðamenn sæki landið heim á næsta ári og að ferðaþjónustan verði hryggjarstykkið í útflutningsvexti komandi ára.

Útlit er fyrir að aðstæður á vinnumarkaði muni styðja við einkaneysluna, þó nokkuð hægi á vexti hennar á næsta ári eftir metár í ár. Gert er ráð fyrir að atvinnuleysi muni haldast nokkuð stöðugt út spátímann, á milli 3,7%-3,9%, og að fyrirtæki þurfi að mæta umtalsverðum launahækkunum á komandi misserum. Neikvæður raunlaunavöxtur er því aðeins tímabundinn. Spáð er nýjum veruleika á húsnæðismarkaði, veruleika þar sem vísitala íbúðaverðs sveiflast milli mánaða, árstakturinn fellur hratt og dansar í kringum núllið er líða tekur á næsta ár. Þá munu raunverðslækkanir vera viðvarandi næstu þrjú ár. Verðbólgan getur því hjaðnað nokkuð hratt, en sökum viðvarandi innlends verðbólguþrýstings og verðhækkana innfluttra afurða er verðbólgumarkmið Seðlabankans ekki í augsýn. Spáð er 6% verðbólgu á næsta ári. Óbreyttir vextir eru enn um sinn líklegasta niðurstaðan, en þróunin mun ráðast af kjölfestu verðbólguvæntinga, aðhaldi í ríkisfjármálum og ákvörðunum á vinnumarkaði.

Það er fátt sem fellur með krónunni um þessar mundir, vaxtamunur fer minnkandi og lífeyrissjóðir auka við erlendar fjárfestingar sínar, á sama tíma og viðskiptakjörin gefa eftir og Íslendingar fá ekki nóg af utanlandsferðum. Gengisspáin byggir á þeirri forsendu að gengi krónunnar haldi áfram að gefa eftir fram á næsta ár, en að flæðið, og ekki síst væntingar um innflæði, leggist síðar á sveif með krónunni.

Efnahagshorfur 2022-2025