Ný og ein­föld leið fyrir fyrir­tæki til að stofna til banka­viðskipta

Ný stafræn lausn á vef Arion banka gerir fyrirtækjum kleift að stofna til viðskipta við bankann á einfaldan og hraðvirkan hátt. Þegar stofnað er til viðskipta með þessum hætti fæst strax aðgangur að netbanka og bankareikningi. Áfram verður hægt að stofna til viðskipta í útibúum bankans.

Fram til þessa hefur stjórnarfólk fyrirtækja þurft að undirrita fjölda pappíra vegna stofnunar bankaviðskipta og skila frumritum allra skjala í næsta bankaútibú. Hin nýja lausn byggir á auðkenningu og undirritun stjórnar með rafrænum skilríkjum sem skila miklum pappírssparnaði auk þess að spara mörg spor við gagnaöflun og undirskriftir.

Stöðug aukning í notkun stafrænna lausna

Þessi nýja stafræna lausn er afrakstur þróunarvinnu Arion banka sem miðar að því að auka þægindi viðskiptavina og spara þeim dýrmætan tíma. Að undanförnu hefur bankinn sett í loftið fjölda nýrra stafrænna þjónustuleiða fyrir einstaklinga en lausnin sem nú er kynnt er sú fyrsta á sviði stafrænnar fyrirtækjaþjónustu. Áður hefur Arion banki meðal annars kynnt stafræna greiðsludreifingu kreditkortareikninga, greiðslumat og íbúðalánaumsóknir.

Viðskiptavinir hafa tekið nýjum stafrænum lausnum vel og nýta í stórauknum mæli fjölbreyttar leiðir til sjálfsafgreiðslu. Arion banki er eini íslenski bankinn sem býður tilvonandi viðskiptavinum að stofna til viðskipta á netinu en einstaklingum hefur boðist sú þjónusta frá því í ágúst 2016 og fer hlutfall þeirra sem kjósa að stofna til viðskipta í sjálfsafgreiðslu sífellt hækkandi.

Fleiri stafrænar lausnir væntanlegar

Arion banki leggur ríka áherslu fjölbreyttar og þægilegar þjónustuleiðir í takt við þarfir og óskir viðskiptavina. Í útibúum bankans er áfram veitt vönduð fjármálaráðgjöf en viðskiptavinir eru jafnframt hvattir til að koma í útibú og fá kynningu á nýjum stafrænum lausnum. Arion banki mun áfram vinna að innleiðingu stafrænna þjónustuleiða og fleiri lausna er að vænta á næstunni.

Umsóknarsíða fyrirtækja