Ný og ein­föld leið til endur­fjármögnun­ar á vef Arion banka

Frá og með deginum í dag er hægt að sækja um endurfjármögnun íbúðalána og undirrita öll fylgiskjöl á vef Arion banka með rafrænum skilríkjum. Mjög einfalt er að kynna sér kjör sem bjóðast á nýjum lánum og sækja um íbúðalán hjá Arion banka til að greiða upp eldri lán, óháð lánastofnun, sé það til hagsbóta.

Jafnframt hefur verið tekin í notkun ný lánareiknivél á vef bankans. Þar er hægt að bera kjör eldri lána saman við þau kjör sem bjóðast á nýjum íbúðalánum en slíkur samanburður auðveldar upplýsta ákvarðanatöku til muna. Ef kjör nýrra íbúðalána reynast hagstæðari, tekur umsókn um endurfjármögnun skamman tíma. Alltaf má gera hlé á umsókninni til að meta þá kosti sem eru fyrir hendi og taka síðan upp þráðinn að nýju þegar hentar.

Innleiðing stafrænna þjónustuleiða

Þessi nýja stafræna lausn einfaldar endurfjármögnun íbúðalána til muna en lausnin byggist meðal annars á stafrænu greiðslumati sem Arion banki kynnti í lok árs 2016. Reynslan af nýja greiðslumatinu og öðrum stafrænum lausnum sem bankinn hefur kynnt að undanförnu, er afar góð. Viðskiptavinir nýta í stórauknum mæli nýjar og þægilegar þjónustuleiðir bankans. Sem dæmi má nefna að framkvæmd greiðslumats hjá Arion banka hefur tvöfaldast að magni til frá því að ný stafræn lausn var kynnt til sögunnar.

Lausnin er afrakstur þróunarvinnu Arion banka sem miðar að því að bjóða viðskiptavinum betri bankaþjónustu og spara þeim tíma. Áður hefur bankinn meðal annars kynnt stafræna greiðsludreifingu kreditkortareikninga, íbúðalánaumsóknir, og einfaldar leiðir fyrir einstaklinga og fyrirtæki til að stofna til bankaviðskipta. Arion banki mun áfram vinna að innleiðingu stafrænna þjónustuleiða og fleiri lausna er að vænta á næstunni.

Óbreytt skilyrði lántöku

Öll skilyrði varðandi greiðslumat og veitingu íbúðalána eru óbreytt frá því sem áður var. Áfram er lánað fyrir allt að 80% af markaðsvirði fasteigna og lántökugjald íbúðalána er áfram 49.900 kr. óháð lánsfjárhæð. Lögð er rík áhersla á fræðslu og ábyrga ráðgjöf á sviði fjármála. Á nýja umsóknarvefnum eru stutt fræðslumyndbönd, svör við algengum spurningum og upplýsingar um algengar lánasamsetningar. Einnig er hægt að bóka fund með fjármálaráðgjafa í útibúi bankans, panta símtal og senda fyrirspurnir.

Nánari upplýsingar um endurfjármögnun
Reiknivél endurfjármögnunar
Sækja um endurfjármögnun