02.05.2019
Ró-Box frá Tækniskólanum var valið besta íslenska nemendafyrirtækið árið 2019
Fyrirtækið Ró-Box, sem er í eigu nemenda við Tækniskólann, var valið fyrirtæki ársins 2019 í samkeppni Ungra frumkvöðla, Junior Achievement á Íslandi.
Lokaumferð keppninnar fór fram í höfuðstöðvum Arion banka 30. apríl sl. og er bankinn jafnframt einn af aðalstyrktaraðilum Ungra frumkvöðla. Mun Ró-Box keppa fyrir Íslands hönd í Evrópukeppni Ungra frumkvöðla, sem fram fer í Lille í Frakklandi dagana 3.-5. júlí 2019, á 100 ára afmæli JA á heimsvísu. Ró-Box selur einföld róbota-box fyrir krakka sem hjálpa börnum að læra á tækni og forritun og eru þau með íslenskum leiðbeiningum.
Til að gefa meirihluta íslenskra nemenda færi á að kynnast frumkvöðlastarfi af eigin raun í námi sínu stendur Junior Achievement á Íslandi árlega fyrir fyrirtækjasmiðju í framhaldsskólum landsins. Markmiðið er að efla frumkvöðlaanda meðal ungmenna og þjálfa frumkvöðla framtíðarinnar. Árið 2019 tóku 560 nemendur í 13 framhaldsskólum þátt og er útlit fyrir að fjöldinn verði enn meiri á næstu árum.
Ungir frumkvöðlar efla íslenska nýsköpunarmenningu með átaki sínu í framhaldsskólum og bætast þar með við þau verkefni sem fyrir eru á öðrum skólastigum s.s. Startup Reykjavík og Startup Energy Reykjavík á háskólastigi og Nýsköpunarkeppni grunnskólanna á grunnskólastigi. Öllu þessu starfi er ætlað að hvetja ungt fólk til þess að tileinka sér nýsköpun í starfi og námi og er stutt af Arion banka.
Í þetta sinn voru tuttugu fyrirtæki frá þrettán framhaldsskólum valin úr hópi 120 fyrirtækja til að taka þátt í úrslitum Ungra frumkvöðla 2019. Eftirfarandi fyrirtæki hlutu verðlaun:
Fyrirtæki ársins 2019: Ró-Box (Tækniskólinn)
Fyrirtæki ársins - 2. sæti: Blakkur (Borgarholtsskóli)
Fyrirtæki ársins - 3. sæti: Karma (Menntaskólinn í Kópavogi)
Áhugaverðasta nýsköpunin: Fruss (Menntaskólinn við Hamrahlíð)
Besti Sjó-Bisnessinn: Haf hársprey (Verslunarskóli Íslands)
Fallegasti sölubásinn: Sylque (Verslunarskóli Íslands)
Besta matvælafyrirtækið: Gen-Yo (Kvennaskólinn í Reykjavík)
Bestu markaðsmálin: Hafmey (Menntaskólinn við Sund)
Umhverfisvænasta lausnin: Vei! (Fjölbrautaskólinn í Garðabæ)
Besta tæknilausnin: iRadar (Verslunarskóli Íslands)
Samfélagsleg nýsköpun: Tilfinningamolar (Borgarholtsskóli)
Besta fjármálalausnin: Ungdómur (Fjölbrautaskólinn við Ármúla)
Besta hönnunin: A Bag Project (Fjölbrautaskólinn í Garðabæ)
Um Unga frumkvöðla - Junior Achievement
Junior Achievement (JA) eru alþjóðleg félagasamtök sem starfa á heimsvísu en verkefni á vegum samtakanna snerta meira en tíu milljónir nemenda á ári hverju í 122 löndum, þar af yfir fjórar milljónir nemenda í 40 Evrópulöndum. Samtökin leitast við að undirbúa ungt fólk fyrir framtíðina og auka færni þeirra til atvinnuþátttöku og atvinnusköpunar með því að stuðla að aukinni nýsköpunar-, frumkvöðla- og viðskiptamenntun í skólum. JA á Íslandi er þátttakandi í JA á heimsvísu en samtökin verða 100 ára á árinu.
Deila grein:
