Sam­ið um kaup Rapyd á Valitor fyrir 12,3 millj­arða króna

• Rapyd kom fyrst inn á íslenskan markað árið 2020

• Kaupin styrkja stöðu Rapyd á Íslandi til muna

• Ísland verður þungamiðja í starfsemi Rapyd í Evrópu

• Kaupin eru gerð með fyrirvara um samþykki eftirlitsaðila

• Arion banki gerir ráð fyrir að færa til tekna 3,5 milljarða króna eftir skatta vegna sölunnar

Alþjóðlega fjártæknifélagið Rapyd og Arion banki hafa komist að samkomulagi um kaup Rapyd á Valitor hf. Valitor er leiðandi fyrirtæki hér á landi á sviði greiðslulausna og er kaupverð 100 milljónir bandaríkjadala eða 12,3 milljarðar íslenskra króna. Gert er ráð fyrir því að kaupin klárist í lok þessa árs en þau eru gerð með fyrirvara um samþykki eftirlitsaðila.

Áhrif viðskiptanna á fjárhag Arion banka verða jákvæð því bankinn gerir ráð fyrir að færa til tekna rúmlega 3,5 milljarða eftir skatta, sem er munur á söluverði og bókfærðu virði félagsins að frádregnum sölukostnaði. Þá áætlar bankinn að umfram eigið fé hækki um 8 til 11 milljarða króna.

Valitor er vel þekkt greiðsluþjónustufyrirtæki og hefur verið leiðandi í færsluhirðingu, bæði í netgreiðslum og posaviðskiptum, sem og kortaútgáfu í Evrópu. Félagið býður upp á greiðslulausnir til söluaðila á Íslandi, Bretlandi og Írlandi og um alla Evrópu. Kaupin á Valitor munu auka vöruframboð Rapyd í Evrópu.

Viðskiptavinir Valitor munu ekki verða fyrir neinni röskun á þjónustu vegna kaupanna og eiga brátt að hafa aðgang að greiðsluleiðum og fjártækniþjónustu Rapyd sem ætlar að vinna náið með íslenskum viðskiptavinum í því skyni að greiða þeim leið að næstu kynslóð greiðslulausna og gera þeim þannig kleift að auka viðskipti sín erlendis.

Arik Shtilman, forstjóri Rapyd og stofnandi:
„Ísland hefur í lengri tíma verið í forgrunni hvað varðar notkun á rafrænum greiðslumiðlum og nýsköpun, en hér er mikið af hæfileikaríku fólki og þróaður greiðslumarkaður. Við hyggjumst halda áfram að byggja upp starfsemi hér og halda áfram að fjárfesta á Íslandi. Við erum að gera Ísland að miðstöð greiðslumiðlunar samstæðunnar fyrir Evrópu og stefnum á að verða einn stærsti alþjóðlegi vinnuveitandi landsins“.

Benedikt Gíslason, bankastjóri Arion banka:
„Það hefur verið markmið okkar um nokkurt skeið að finna Valitor nýja eigendur sem henta félaginu vel og teljum við að það hafi tekist með þessum samningum. Rapyd er í fararbroddi þegar kemur að nýjungum og nýsköpun á sviði greiðslumiðlunar og passa félögin einstaklega vel saman og bæta í raun hvort annað upp. Ég þakka starfsfólki Valitor fyrir frábært samstarf á undanförnum árum og óska þeim velfarnaðar á þeirri spennandi vegferð sem framundan er, nú sem hluti af Rapyd samstæðunni.“

Herdís Fjeldsted, forstjóri Valitor:
„Kaup Rapyd á Valitor marka tímamót í langri sögu Valitor og greiðslumiðlunar á Íslandi. Við hjá Valitor erum full tilhlökkunar að vinna með nýju fólki, Arik og starfsfólki Rapyd, við að samþætta starfsemi félaganna og grípa þau tækifæri sem samþættingin felur í sér, bæði fyrir félagið og viðskiptavini þess.“

Macquarie Capital, Logos og Mörkin voru Arion banka til ráðgjafar og Gornitzky, PwC, Jakob Ásmundsson og BBA / Fjeldco voru Rapyd til ráðgjafar.