Stefnir 30 ára: Vöxt­ur, ný­sköp­un og aukið að­gengi að sparnaði fyrir alla

Stefnir hf., dótturfélag Arion banka hf., fagnar 30 ára starfsafmæli í ár. Frá stofnun árið 1996 hefur Stefnir vaxið í eitt farsælasta sjóðastýringarfélag landsins. Þar starfa nú tuttugu manns og eru rúmlega 390 milljarðar króna í virkri stýringu félagsins.  

Frá faxi til fjárfestinga í símanum 

Þegar Stefnir var að slíta barnsskónum, undir lok síðustu aldar, var internetið aðeins rétt að ryðja sér til rúms á íslenskum heimilum. Viðskiptafyrirmæli bárust oft með faxi, skýrslugjöf var að stórum hluta handunnin og verðbréf oft geymd í skúffum í formi pappírsskírteina, innan um bréfaklemmur og heftara.  

Þrjátíu árum síðar er veruleikinn heldur betur breyttur. Fjárfestar geta nú keypt í sjóðum á nokkrum sekúndum í símanum sínum, reglubundinn sparnaður er orðinn miklu aðgengilegri þökk sé stafrænni tækni og gervigreind er að endurmóta allt vinnulag fólks í fjármálaþjónustu.  

Þrátt fyrir örar tæknibreytingar, nýtt regluverk og síbreytilega markaði hafa áherslurnar hjá Stefni þó haldist óbreyttar alla tíð. Í fyrirrúmi er áherslan á traust milli starfsfólks og viðskiptavina félagsins, fagmennska og skýr framtíðarsýn við meðferð fjármuna viðskiptavina. Samfélagslegar áherslur félagsins endurspeglast enn fremur í því að árið 2012 varð Stefnir fyrst íslenskra félaga til að hljóta viðurkenningu sem fyrirmyndarfyrirtæki í góðum stjórnarháttum og hefur haldið þeirri stöðu allar götur síðan. 

Kröftugur vöxtur síðustu ár 

Stefnir hefur vaxið hratt á undanförnum árum. Eignir í stýringu félagsins jukust úr um 260 milljörðum króna í árslok 2022 í rúma 379 milljarða króna í árslok 2025 og nema nú yfir 390 milljörðum króna. Samhliða þeim vexti hefur viðskiptavinum fjölgað jafnt og þétt og eru þeir nú um 14.300 talsins og hafa ekki verið fleiri í sögu félagsins. 

Reglubundinn sparnaður hjá Stefni nýtur sífellt meiri vinsælda. Á síðasta ári fjölgaði þeim sem skráðu sig í reglubundna áskrift í sjóði um 40% og flest viðskipti fara nú fram í Arion appinu. Þar geta einstaklingar, forráðamenn barna og fyrirtæki fjárfest með einföldum hætti, hvar og hvenær sem er. 

Leiðandi í því að kynna breytingar í fjármálaþjónustu 

Stefnir hefur á undanförnum árum lagt sérstaka áherslu á að gera fjárfestingar aðgengilegri. Gengismunur sjóða var felldur niður, lágmarksfjárhæð og afgreiðslugjöld við kaup og sölu afnumin ásamt því að þóknanir Premíu-sjóða voru lækkaðar. 

Markmiðið er að fleiri geti byggt upp reglubundinn sparnað og tekið þátt á verðbréfamarkaði, óháð fjárhæð eða fyrri reynslu. 

Átaksverkefni Arion samstæðunnar, Konur fjárfestum, hefur sömuleiðis stuðlað að aukinni þátttöku kvenna í fjárfestingum. Frá því verkefnið hófst hefur konum sem fjárfesta í sjóðum Stefnis fjölgað um 56%. 

Tólin breytt en markmiðið það sama 

Þrjátíu árum eftir stofnun er Stefnir á margan hátt breytt félag. Verkfærin eru önnur, tæknin öflugri og þjónustan aðgengilegri. Grunnurinn er þó enn sá sami: Faglegt og metnaðarfullt fólk vinnur af ábyrgð að því verkefni að skapa sem mest verðmæti fyrir viðskiptavini sína. 

Við hlökkum til næstu þrjátíu ára og horfum bjartsýn fram á veginn.