31.05.2017
Tíu teymi valin til þátttöku í Startup Reykjavík
Startup Reykjavík fram í sjötta sinn í sumar. Um 150 teymi sóttu um að taka þátt þetta árið og hafa tíu sprotafyrirtæki verið valin til þátttöku. Áður hafa fimmtíu fyrirtæki tekið þátt í viðskiptahraðlinum frá árinu 2012 sem hafa samtals fengið um 1,6 milljarða íslenskra króna í fjármögnun.
Startup Reykjavík er samstarfsverkefni Arion banka og Icelandic Startups. Arion banki er eigandi verkefnisins og fjárfestir jafnframt 2,4 milljónum króna í hverju fyrirtæki sem valið er til þátttöku.
Áhugafólk er hvatt til að fylgjast með framgangi sprotafyrirtækjanna og opnum viðburðum sumarsins á Facebook-síðu Startup Reykjavík.
Sprotafyrirtækin tíu sem hafa verið valin til þátttöku í sumar eru:
Bone & Marrow
Heilsu- og matvælafyrirtæki sem leitar í smiðju forfeðra eftir æskilegri næringu handa nútímamanninum.
Data Plato
Sýndar-fjármálastjóri sem veitir fyrirtækjum aðstoð við stjórnun fjármála með nýtingu gervigreindar.
Itogha
Greina ákveðna áhættuþætti sem tengjast lífstílssjúkdómum með einföldum prófum, þar á meðal hjarta- og æðasjúkdóma. Itogha býður einnig upp á matvæli sem þróuð hafa verið í samstarfi við vísindamenn og matreiðslufólk og eiga að draga verulega úr líkum á lífstílssjúkdómum.
Myrkur
Leikjafyrirtæki sem vinnur nú að hönnun og þróun á nýjum ævintýra hlutverkaleik.
My Shopover
Hugbúnaður sem gerir ferðamönnum kleift að tengjast heimamanni, eða verslunarráðgjafa og fá ráðleggingar varðandi verslun á svæðinu.
Maul
Hugbúnaður sem í krafti fjöldans gerir starfsmönnum ólíkra vinnustaða kleift að panta daglega hádegismat víðs vegar frá og sendir á staðinn.
Porcelain Fortress
Tölvuleikjastúdíó sem leggur áherslu á að gera skemmtilega, litla og vandaði leiki fyrir PC og leikjatölvur.
Flow Education
Heildstætt einstaklingsmiðað námskerfi sem byggt er á nútímatækni og leiðandi kenningum í sálfræði til að hraða fyrir námi barna.
Safe Seat
Fjaðrandi bátasæti sem verndar hryggsúluna í erfiðu sjólagi.
Zifra Tech
Þróa minniskort sem dulkóðar upptökur á rauntíma. Í upphafi er horft til fjölmiðlafólks sem þarf að vernda sig, sögur sínar og heimildarmenn.
Deila grein:
