Ung­ir frum­kvöðl­ar spreyta sig á stofn­un og rekstri fyrir­tækja

Um 300 ungir frumkvöðlar í framhaldsskólunum fá að spreyta sig á stofnun og rekstri fyrirtækja í nýsköpunarátaki sem félagið Ungir frumkvöðlar á Íslandi, Junior Achievement (JA), stendur fyrir í átta íslenskum framhaldsskólum.

Upphafsfundur átaksins verður haldinn í dag, 12. janúar kl. 17:00-18:00 í Háskólanum í Reykjavík. Þar flytja erindi meðal annars Illugi Gunnarsson, menntamálaráðherra, Ragna Árnadóttir, aðstoðarforstjóri Landsvirkjunar og Hörður Guðmundsson sem er einn af stofnendum Study Cake sem er eitt af tíu sprotafyrirtækjum sem tóku þátt í Startup Reykjavík árið 2015. Arion banki er stoltur aðili að Junior Achievement á Íslandi og situr Höskuldur H. Ólafsson, bankastjóri Arion banka í stjórn félagsins.

Þeir sem eru áhugasamir um nýsköpun eru hjartanlega velkomnir í Háskólann í Reykjavík í dag.

Á myndinni má sjá hluta af nýskipaðri stjórn Junior Achievement á Íslandi, ásamt Minnu Melleri framkvæmdastjóra JA, en stjórnina skipa: Hörður Arnarson, forstjóri Landsvirkjunar (stjórnarformaður), Höskuldur H. Ólafsson, bankastjóri Arion banka, Gylfi Sigfússon, forstjóri Eimskips, Þorsteinn Víglundsson, framkvæmdastjóri Samtaka atvinnulífsins, Þorgerður Katrín Gunnarsdóttir, forstöðumaður mennta- og nýsköpunarsviðs Samtaka atvinnulífsins, Þorsteinn Ingi Sigfússon, forstjóri Nýsköpunarmiðstöðvar Íslands, Ari Kristinn Jónsson, rektor Háskólans í Reykjavík, Þór Sigfússon, forstjóri Sjávarklasans, Sigríður Hallgrímsdóttir, aðstoðarmaður menntamálaráðherra og Petra Bragadóttir, kennari við Fjölbrautaskólann í Ármúla.