19.05.2017
Ungt uppfinningafólk í Arion banka
Fimmtudaginn 18. maí mætti hópur hressra krakka í höfuðstöðvar Arion banka. Þar tóku þau þátt í vinnustofu Nýsköpunarkeppni grunnskólanna en Arion banki er einn af bakhjörlum keppninnar.
Í febrúar var auglýst eftir nýsköpunarhugmyndum frá nemendum í 5.-7. bekk og bárust yfir 1.100 hugmyndir. Dómnefnd valdi 25 hugmyndir sem komust að á vinnustofunni þar sem hið unga uppfinningafólk fékk fjármálafræðslu, aðstoð við gerð viðskiptalíkans og kennslu í að breyta hugmynd í veruleika.
Erla Sigurlaug Sigurðardóttir í markaðsdeild Arion banka:
„Það var virkilega skemmtilegt að fylgjast með öllum þessum litlu frumkvöðlum. Þau eru svo ótrúlega einlæg og skýr og auðvitað alveg uppfull af frábærum hugmyndum. Hugmyndirnar sem var unnið með á vinnustofunni voru af öllum stærðum og gerðum, til dæmis sögubangsi sem hægt er að tengja með bluetooth við síma, vatnshreinsunar- og matarsóunarkerfi, heimalærdómsapp og margt fleira.“
Á morgun, laugardaginn 20. maí, verður lokahóf Nýsköpunarkeppni grunnskólanna haldið í Háskólanum í Reykjavík þar sem veitt verða ýmis verðlaun til þátttakenda ársins.
Á Facebook-síðu Arion banka má finna stutt myndbrot frá vinnustofunni en nánari upplýsingar um Nýsköpunarkeppni grunnskólanna má finna á vefsíðu keppninnar.
Deila grein:
