14.08.2019
Yfir 2.500 þátttakendur á Arion banka mótinu í fótbolta
Yfir 2.500 börn hafa skráð sig til leiks á Arion banka mótinu í fótbolta sem haldið verður um helgina, 17.-18. ágúst, á félagssvæði Víkings í Fossvogi. Er þetta í tíunda sinn sem mótið er haldið við frábærar undirtektir.
Arion banka mótið er fyrir 7. og 8. flokk stúlkna og drengja og er stærsta mótið þar sem bæði kynin spila á sama tíma. Mótið stendur yfir frá kl. 9.00-17.00 á laugardag og frá kl. 9.00-15.00 á sunnudag. Keppt verður á 21 velli og verður mótið í Sparilandsbúningi. Bíbí, Blaki og Ari verða á svæðinu og allir þátttakendur fá glæsilegan glaðning og verðlaunapening.
Mikill fjöldi fólks verður samankominn á mótinu og til gamans má geta að milli 350-400 sjálfboðaliðar verða á svæðinu og þar af eru 250 dómarar sem munu dæma í kringum 6.500 leiki hjá 460 liðum yfir helgina. Það má því búast við skemmtilegri stemningu í Víkinni í Fossvogi um helgina þegar ungir fótboltaiðkendur ásamt stuðningsfólki koma saman.
Deila grein:
