Hreyfing sem breyt­ir leikn­um

Þriðjudaginn 17. mars síðastliðinn fór fram viðburðurinn „Konur fjárfestum – hreyfing sem breytir leiknum“ í Háskóla Íslands. Voru það Arion banki og Rannsóknasetur um jafnrétti í efnahags- og atvinnulífi sem héldu viðburðinn, á ráðstefnunni Viðskipti og vísindi.

Á tveimur árum hefur Konur fjárfestum átaksverkefni Arion banka vakið mikla athygli á landsvísu og orðið mikilvægt framlag til umræðu um þátttöku kvenna á fjármálamarkaði. Á viðburðinum var farið yfir árangur verkefnisins til þessa, stöðuna í jafnréttismálum í fjárfestingum og atvinnulífi og þær áskoranir sem fram undan eru.

Ásta Dís Óladóttir, prófessor og stofnandi rannsóknasetursins, Snædís Ögn Flosadóttir, forstöðumaður á mörkuðum Arion banka, og Sigrún Ósk Jakobsdóttir, mannauðsstjóri Advania á Íslandi, fluttu allar erindi.

Á eftir mættust svo þrír leiðtogar úr atvinnulífinu, þau Benedikt Gíslason, forstjóri Arion banka, María Björk Einarsdóttir, forstjóri Símans, og Halldór Benjamín Þorbergsson, forstjóri Heima, og ræddu helstu ástæður bakslags í jafnréttismálum, fjárfestingarbil kynjanna og hvað stjórnendur geta gert til að jafna tækifærin. Umræðunum stýrði Katrín Jakobsdóttir, stjórnarformaður Rannsóknasetursins.