Rýnt í framtíð fisk­eldis á glæsi­legri ráðstefnu í Arion banka

Hringborð sjávar og eldis (Icelandic Aquaculture and Ocean Forum, eða IAOF) stóð fyrir fiskeldisráðstefnu í samstarfi við Arion banka fjórða árið í röð dagana 21. og 22. maí síðastliðinn.

Ráðstefnan fór fram í höfuðstöðvum Arion banka, Borgartúni 19, og var haldin fyrir valinn hóp fjárfesta, forsvarsmenn leiðandi fyrirtækja og lykilhagsmunaaðila í greininni.

Áhrifafólk úr greininni fjölmennti

Fjöldamargt áhrifafólk úr greininni tók þátt í ráðstefnunni, meðal annars Aleks Engel, partner hjá Novo Holdings; Maarten Bijl, forstjóri Skretting, stærsta fóðurframleiðanda í heimi; Gustav Witzøe, stjórnarformaður hjá SalMar; og Nina Stangeland, framkvæmdastjóri hjá High Liner Foods, sem er stærsta sjávarútvegsfyrirtæki í Norður-Ameríku.

Meðal íslenskra frummælenda voru Hanna Katrín Friðriksson atvinnuvegaráðherra, Vala Valþórsdóttir, framkvæmdastjóri Aurora Abalone, dr. Júlíus B. Kristinsson hjá Marbot og Anna Þóra Hrólfsdóttir hjá Matís.

Að þessu sinni var meðal annars rætt um spennandi möguleika í þörunga- og sæeyrnarækt, þróun og framtíð fiskeldis og þróun alþjóðlegs sjávarútvegs.

Umræður beindust sérstaklega að samkeppnishæfni Íslands á alþjóðavettvangi, sjálfbærni og þeim tækifærum sem felast í áframhaldandi uppbyggingu.

Nauðsynlegt að regluverkið styðji vel við fiskeldið

Benedikt Gíslason, bankastjóri Arion banka, nefndi í opnunarerindi sínu stöðu Íslands og mikilvægi trausts regluverks.

„Sérstaða Íslands – græn orka, tært vatn og sterk staða í stofnum uppsjávartegunda – er hér traustur grunnur,“ sagði Benedikt. „En til að viðhalda og efla samkeppnishæfni okkar í fiskeldi á alþjóðlegum vettvangi þurfum við að huga vel að regluverki, skattaumhverfi og tollum.“

Benedikt benti á að fiskeldi á Íslandi hefði vaxið hratt á undanförnum árum og næmi nú um 15% af útflutningsverðmæti sjávarafurða Íslands. Samhliða auknum umsvifum hefði þörfin fyrir fjármagn aukist verulega og því gegndu fjármálafyrirtæki mikilvægu hlutverki í að styðja við frekari þróun og áframhaldandi þroska greinarinnar.

Bankinn tengir saman innlenda og erlenda fjárfesta

Arion banki hefur um árabil verið virkur þátttakandi í uppbyggingu fiskeldis á Íslandi, bæði með fjármögnun og með því að tengja saman innlenda og erlenda fjárfesta með sérþekkingu á sviðinu. Hinni árlegu ráðstefnu IAOF og bankans er ætlað að búa til vettvang til að miðla þekkingu, ræða áskoranir og skoða lausnir sem styðja við sjálfbæran vöxt greinarinnar á komandi árum.