The Ban­ker vel­ur Arion banka banka ársins 2021 á Ís­landi

Fjármálatímaritið The Banker, sem gefið er út af The Financial Times, hefur valið Arion banka sem banka ársins á Íslandi árið 2021.

Í rökstuðningi tímaritsins kemur fram að horft hafi verið til árangurs bankans og áherslu hans á umhverfis- og félagsþætti sem og stjórnarhætti (UFS). The Banker nefnir að auki nokkra þætti í stefnu og starfsemi bankans sem tímaritið telur hafa skipt sköpum í þeim árangri sem bankinn hefur náð. Sérstaklega er horft til þess að þjónusta bankans við fyrirtæki var efld með því að sameina fyrirtækjalána- og fjárfestingarbankastarfsemi á einu sviði innan bankans. En einnig til skapandi nálgunar bankans þegar kemur að vöru- og þjónustuþróun, bæði hvað varðar nýjar vörur og eldri. Sú staðreynd að lífeyrismál eru nú aðgengileg í Arion appinu vakti sérstaka athygli. En Arion banki, fyrstur banka, hefur gert viðskiptavinum sínum kleift að sækja um viðbótarlífeyrissparnað og nálgast upplýsingar um stöðu sinna lífeyrismála með einföldum og þægilegum hætti í Arion appinu.

Við valið á Arion banka sem banka ársins á Íslandi árið 2021 var einnig tekið til þess að bankinn hefur bætt grænni fjármálaþjónustu við vöruframboð sitt. Arion banki var fyrstur til að kynna hér á landi græn innlán og græn íbúðalán en að auki stendur viðskiptavinum til boða að taka græn bílalán. Græn innlán eru hugsuð fyrir einstaklinga, félagasamtök og fyrirtæki sem vilja leggja sitt af mörkum til umhverfisvænni framtíðar. Þannig hafa græn innlán m.a. verið nýtt til að fjármagna græn bílalán og mengunarvarnir. Í dag nema græn innlán bankans um 11 milljörðum króna.