Vör­um við svika­póstum

Undanfarnar vikur hafa óprúttnir aðilar reynt að nálgast korthafa með tölvupósti eða SMS -skilaboðum í nafni þekktra innlendra fyrirtækja og beðið korthafa um að senda persónu- og kortaupplýsingar vegna væntanlegrar endurgreiðslu inn á greiðslukort. Þessa dagana er hrina í gangi þar sem verið er að senda út svikapósta í nafni Póstsins.

Af því tilefni er rétt að ítreka að almenna reglan er að fyrirtæki og stofnanir biðja ekki um kortaupplýsingar einstaklinga, hvorki í tölvupósti, í gegnum SMS eða með símtali. Fái korthafar slíka beiðni mælum við með að viðkomandi hafi beint samband við viðkomandi fyrirtæki eða stofnun og sannreyni uppruna slíkra beiðna.

Það er mikilvægt að korthafar staldri við þegar þeir fá slík skilaboð, hvort sem er í pósti eða með SMS og smelli ekki á hlekki sem oft fylgja slíkum skilaboðum því oft er um að ræða svikasíður.

Í sumum tilvikum eru svikararnir að nýta sér staðfestingarkóða í gegnum Vottun Visa. Korthafi fær SMS með staðfestingarkóða. Hann er beðinn að um að slá kóðann inn á svikasíðuna eða senda upplýsingar um hann í tölvupósti eða með SMS. Í SMS kemur fram hvaða færslu er verið að biðja um staðfestingu á, söluaðili, upphæð og gjaldmiðill. Ef færsla er staðfest með slíkum kóða þá er hún óafturkræf. Í öðrum tilvikum fær fær korthafi tilkynningu um að verið sé að skrá kortið hans í Apple Pay, Fitbit Pay eða Garmin Pay. Korthafi fær sendan kóða með SMS sem hann er beðinn um að slá inn á svikasíðu, senda í SMS eða með tölvupósti. Ef kóðinn er sleginn inn er kortið komið í Wallet svikarans.

Arion banki brýnir fyrir korthöfum að smella ekki á hlekki sem fylgja skilaboðum sem þessum og gefa ekki undir neinum kringumstæðum upp kortaupplýsingar, né staðfestingarkóða. Hafi fólk brugðist við slíkum skilaboðum eða eru í minnsta vafa um réttmæti upplýsinga sem þeir fá er brýnt að hafa samband strax við Arion banka eða þjónustuver Valitor utan opnunartíma bankans.

Hér má nálgast nánari upplýsingar um netöryggi.