Kon­ur fjár­festum á Ice­land Innovati­on Week

Þann 30. apríl síðastliðinn hélt Arion banki viðburð í samstarfi við IceBAN undir yfirskriftinni Konur fjárfestum x IceBAN: Að leiða fjármálabyltingu. Viðburðurinn var liður í dagskrá Iceland Innovation Week sem fram fór dagana 27.-30. apríl. Þess má geta að Benedikt Gíslason, bankastjóri Arion banka, opnaði nýsköpunarvikuna ásamt Skúla Mogensen, athafnamanni, í Hvammsvík þann 27. apríl.

Þetta er í annað skipti sem Arion banki tekur virkan þátt í vikunni með því að standa fyrir sérstökum viðburði, en Iceland Innovation Week er árleg nýsköpunarhátíð sem haldin er í Reykjavík og leiðir saman frumkvöðla, sprotafyrirtæki, fjárfesta, fyrirtæki og opinbera aðila. Fram fara fjölbreyttir viðburðir, fyrirlestrar og vinnustofur, auk þess sem þátttakendum gefst kostur á að mynda ný tengsl og efla gömul.

Að þessu sinni vörpuðum við kastljósinu á Konur fjárfestum langtímaátakið okkar.

Iða Brá Benediktsdóttir, aðstoðarbankastjóri, reið á vaðið og sagði áheyrendum frá Konur fjárfestum og þeim mikla árangri sem náðst hefur síðan átakinu var ýtt úr vör.

Næst á svið var Svava Björk Ólafsdóttir, forstjóri og stofnandi IceBAN, sem rýndi í íslenskt fjárfestingaumhverfi og varpaði ljósi á það sem gerir það bæði sérstakt og krökkt af tækifærum. Svava Björk kynnti einnig IceBAN og sýndi fram á hvernig englafjárfestingar geta veitt konum raunhæfa leið til að taka þátt í atvinnulífinu og móta framtíð nýsköpunar á Íslandi.

Að lokum fóru fram pallborðsumræður. Þar mættust þær Þórey Vilhjálmsdóttir Proppe, stofnandi Öldu, Linda Björk Ólafsdóttir, englafjárfestirinn sem studdi Þóreyju, og Ásthildur Otharsdóttir, leiðtogi í áhættufjárfestingum sem fylgdi þeirri fjárfestingu eftir. Saman veltu þær fyrir sér fjárfestingarferðalaginu frá ólíkum sjónarhornum og deildu sýn sinni á tækifæri, áskoranir og þann raunveruleika sem konur standa frammi fyrir í sprotaumhverfinu.

Við þökkum fyrir okkur og hlökkum til að fylgjast áfram með nýsköpunarvikunni á næstu árum.