320 manns hlustuðu á Jón Jóns­son á Ak­ur­eyri

Það var metþátttaka á fræðslufyrirlestri Jóns Jónssonar í Hofi á Akureyri í gærkvöldi en 320 ungmenni mættu þangað til að hlýða á þennan unga hagfræðing ræða um fjármál. Auk Akureyringa kom fólk með rútu frá Siglufirði með viðkomu á Ólafsfirði og Dalvík. Um var að ræða nemendur Verkmenntaskólans á Akureyri, Menntaskólans á Akureyri og Menntaskólans á Tröllaskaga.

Krakkarnir sem sátu fundinn höfðu áhugaverða hluti um hann að segja, þ.á m. „Skemmtilegasta námskeið um fjármál sem ég hef farið á“, „Hélt athygli allan tímann“ og „Kom á óvart hvað ég kosta í einn mánuð“.

Þetta var annar fyrirlesturinn sem Jón heldur nú í haust en næsti fyrirlestur verður haldinn á Selfossi, þriðjudaginn 2. október í Fjölbrautaskóla Suðurlands. Fyrirlestrarnir eru ætlaðir fólki á framhaldsskólaaldri. Jón hélt einnig fyrirlestra í vor fyrir börn á fermingaaldri, þar á meðal í Reykjavík, en fyrirlesturinn sem hann hélt fyrir norðan í gærkvöldi var sá aðsóknarmesti fram til þessa.