29.04.2011
70% viðskiptavina hafa nú þegar staðfest endurútreikning erlendra íbúðalána
Arion banki er að ljúka við endurútreikning erlendra íbúðalána. Eftir á að birta endurútreikning um 20 lána sem eru flóknari í framkvæmd og þarfnast sérmeðferðar. Gert er ráð fyrir að endurútreikningi þeirra lána muni ljúka í maí.
Arion banki hafði þegar birt 98% þeirra lána sem áttu rétt á endurútreikning strax í lok febrúarmánaðar. Viðskiptavinir tóku vel við sér og völdu sér þá leið sem hentaði þeim best.
Valkostir sem viðskiptavinum bankans standa til boða eftir endurútreikning erlendra íbúðalána eru verðtryggt eða óverðtryggt lán með jöfnum afborgunum og verðtryggt eða óverðtryggt jafngreiðslulán. Auk þessara valkosta gefst viðskiptavinum kostur á því að halda óbreyttu láni, hvort sem um upphaflegt lán er að ræða eða nýttar hafa verið lausnir bankans.
Viðskiptavinum bankans er bent á að allar nánari upplýsingar um þá valkosti sem í boði eru má finna á vef Arion banka og í netbankanum. Eru viðskiptavinir hvattir til að setja sig í samband við þjónusturáðgjafa hafi þeir spurningar varðandi endurútreikninginn eða til að kynna sér aðra kosti.
Deila grein:
