Á ann­að hundrað verk hafa borist á Götu­sýninguna 2013

Götusýningin 2013 er stærsta listsýning landsins. Hún er jafnframt sú fyrsta sem fram fer á götuskiltum höfuðborgarinnar og mun setja skemmtilegan svip á borgina í viku Menningarnætur. Sýningin hefur hlotið afar góðar viðtökur meðal listafólks og hönnuða. Þegar hafa borist um 150 listaverk á sýninguna þar sem sköpunargleði, snilli og fjölbreyttar útfærslur fá njótið sín. Mörg mismunandi form mynda eru á sýningunni, málverk, teikningar, ljósmyndir, grafísk hönnun og útsaumur.

Sýningin er öllum opin og allir sem fást við myndlist eða hönnun af einhverju tagi eru hvattir til þátttöku í sýningunni en frestur til innsendingar rennur út 9. ágúst 2013. Einungis þarf að setja ljósmynd af verki á sýninguna inn á arionbanki.is og allar nánari upplýsingar er að finna á vefsíðunni. Stefnt er að því að 500 myndir verði til sýnis á götuskiltum höfuðborgarsvæðisins dagana 20. - 27 . ágúst en einnig má sjá sýninguna í heild á arionbanki.is. Þátttakendur og sýningargestir munu geta fundið hvar verkin eru staðsett í borginni á sömu vefsíðu. Þess má geta að þegar hefur orðið vart áhuga listunnenda á að kaupa verk á sýningunni.

Götusýningin 2013 er framlag Arion banka til Menningarnætur. Með sýningunni vill bankinn laða fram sköpunarkraftinn í samfélaginu, vinna að jákvæðri uppbyggingu og stuðla að nýsköpun.