12.05.2015
Afkoma Arion banka á fyrstu þremur mánuðum ársins 2015
Hagnaður Arion banka á fyrstu þremur mánuðum ársins 2015 markast mjög af óreglulegum liðum. Þar hafa mest áhrif einskiptisatburðir eins og skráning og sala bankans á hlutum í fasteignafélaginu Reitum og alþjóðlega drykkjaframleiðandanum Refresco Gerber. Hagnaður bankans á tímabilinu nam 14,9 milljörðum króna samanborið við 2,9 milljarða króna á sama tímabili 2014. Arðsemi eigin fjár var 35,1% samanborið við 7,8% á sama tímabili árið 2014. Hagnaður af reglulegri starfsemi á tímabilinu nam 4,0 milljörðum króna samanborið við 1,7 milljarða á sama tímabili 2014. Arðsemi eigin fjár af reglulegri starfsemi nam 9,8% á fyrsta ársfjórðungi samanborið við 4,6% á sama tímabili 2014. Heildareignir námu 1.004,3 milljörðum króna samanborið við 933,7 milljarða króna í árslok 2014.
Eiginfjárhlutfall bankans í lok tímabilsins var 23,9% en var 26,3% í árslok 2014. Hlutfall eiginfjárþáttar A nam 21,2% samanborið við 21,8% í lok árs 2014.
Helstu atriði árshlutareikningsins
Hagnaður eftir skatta nam 14,9 mö.kr. samanborið við 2,9 ma.kr. á sama tímabili 2014.
Hagnaður af reglulegri starfsemi nam 4,0 milljörðum króna samanborið við 1,7 milljarð króna á sama tímabili 2014.
Eiginfjárhlutfall nam 23,9% í lok tímabils samanborið við 26,3% í árslok 2014.
Arðsemi eigin fjár var 35,1% samanborið við 7,8% á sama tímabili 2014. Af reglulegri starfsemi nam arðsemin 9,8% á tímabilinu, samanborið við 4,6% á fyrsta ársfjórðungi 2014.
Hreinar vaxtatekjur námu 5,8 mö.kr. samanborið við 5,5 ma.kr. á sama tímabili 2014.
Hreinar þóknanatekjur námu 3,8 mö.kr. samanborið við 3,1 ma.kr. á sama tímabili 2014.
Rekstrartekjur hækka á milli ára og námu 21,8 mö.kr. samanborið við 9,0 ma.kr. á sama tímabili 2014. Mikil hækkun rekstrartekna er einkum tilkomin vegna söluhagnaðar og hækkunar á verðmati á eignarhlut í Reitum fasteignafélagi hf. og Refresco Gerber í tengslum við skráningu félaganna á markað.
Hrein virðisbreyting er jákvæð á tímabilinu og nemur 1,8 ma.kr., samanborið við 2,0 ma.kr. á sama tímabili 2014.
Tekju- og bankaskattar námu samtals 2,5 mö.kr. samanborið við 1,9 ma.kr. á sama tímabili 2014.
Kostnaðarhlutfall var 29,3% en var 69,0% á sama tímabili 2014. Af reglulegri starfsemi nam kostnaðarhlutfall 53,2% samanborið við 69% á fyrsta ársfjórðungi 2014.
Eigið fé bankans var 177,1 ma.kr. en nam 162,2 mö.kr. í lok árs 2014.
Höskuldur H. Ólafsson, bankastjóri Arion banka:
„Afkoman á fyrsta ársfjórðungi þessa árs er mjög góð. Afkoman er vel umfram væntingar þar sem betur tókst til við skráningu og sölu á hluta af eigarhlutum bankans í tveimur félögum, í alþjóðlega drykkjarvöruframleiðandanum Refresco Gerber og í Reitum fasteignafélagi. Þannig markast uppgjörið með jákvæðum hætti af þessum óreglulegu liðum og þar sem um fyrsta ársfjórðung er að ræða eru áhrifin mikil á helstu kennitölur. Þetta er vissulega góð og sterk byrjun á árinu en það er ljóst að óreglulegir liðir munu ekki hafa þetta mikil áhrif á afkomu bankans það sem eftir lifir árs.
Regluleg starfsemi bankans gekk vel á fyrsta ársfjórðingi og skilar ágætri afkomu. Arðsemi reglulegrar starfsemi er tæplega 10% á tímabilinu. Við höldum áfram að vinna að því að styrkja grunnrekstur bankans. Við höfum þar lagt mikla áherslu á að auka hlutdeild þóknanatekna í heildartekjum bankans og jukust þær um 19% miðað við sama tímabil fyrir ári. Af þóknanatekjum bankans koma rúm 80% frá fyrirtækjum en tæp 20% úr þjónustu við einstaklinga í viðskiptabankanum.
Sá mikilvægi áfangi náðist á tímabilinu að bankinn gaf út skuldabréf í evrum sem nam 300 milljónum evra, eða um 45 milljörðum króna. Um var að ræða stærstu skuldabréfaútgáfu íslensks banka í fjölmörg ár. Útgáfan sýnir vel þann árangur sem hefur náðst hér á landi í efnahagsmálum sem og endurspeglar útgáfan trú fjárfesta á bankanum og vinnu hans undanfarin ár.
Á fjórðungnum fór fjöldi heimsókna í Arion appið í fyrsta skipti fram úr fjölda heimsókna í netbanka í einstökum mánuði. Þessi þjónusta hefur opnað nýjar víddir fyrir viðskiptavini í aðgengi og þjónustu og við sjáum þetta þróast hraðar en metnaðarfull markmið okkar stóðu til. Nú eru um 40 þúsund virkir notendur að Arion appinu. Þetta endurspeglar umbreytingu i bankaþjónustu og við sjáum mikla fjárfestingu okkar í þessum tæknilausnum skila sér til viðskiptavina.“
Fundur með markaðsaðilum
Arion banki mun halda símafund á ensku fyrir markaðsaðila, miðvikudaginn 13. maí klukkan 9:00. Á fundinum mun Stefán Pétursson, fjármálastjóri Arion banka, fara yfir helstu atriði í uppgjöri bankans. Áhugasamir geta sent tölvupóst á ir@arionbanki.is fá í kjölfarið sendar nánari upplýsingar.
Afkomutilkynning Arion Banka 3 M 2015
Árshlutareikningur Arion banka 31. mars 2015
Fjárfestakynning Arion banka 3 M 2015
Deila grein:
