17.03.2010
Arion banki eflir fjármálalæsi almennings
Með samstarfs- og styrktarsamningi við Stofnun um fjármálalæsi við Háskólann í Reykjavík vill Arion banki stuðla að betra fjármálalæsi almennings. Samningurinn felur í sér að stofnunin kemur framvegis til með að leiða fræðslufundi Arion banka um fjármál.
Arion banki leggur áherslu á að veita viðskiptavinum haldgóðar upplýsingar, fræðslu og örugga leiðsögn í nýju efnahagsumhverfi. Bankinn hefur undanfarið verið með fyrirlestra og fræðslu undir yfirskriftinni FJÁRmál. Þegar hafa um 300 viðskiptavinir bankans sótt fræðslufundina og á annað hundrað manns hafa skráð sig á fræðslufundi sem eru á döfinni.
Breki Karlsson, forstöðumaður Stofnunar um fjármálalæsi, verður hér eftir leiðandi í mótun fyrirlestra og námskeiða sem FJÁRmál Arion banka standa fyrir. Betra fjármálalæsi stuðlar að gagnrýnni og upplýstri umræðu og ýtir undir fyrirhyggju í fjármálum. Þannig er ekki aðeins lagður grunnur að meiri lífsgæðum, heldur einnig stuðlað að ábyrgara og heilbrigðara samfélagi.
Við undirskrift samstarfssamningsins sagði Breki Karlsson, forstöðumaður Stofnunar um fjármálalæsi að mikil þörf væri á almennri fræðslu um fjármál í samfélaginu. „Það er gleðiefni að stofna til samstarfs af þessum toga og við vonumst eftir mikilli þátttöku á námskeiðum og fyrirlestrum hjá okkur á næstu mánuðum og misserum.“
Nánari upplýsingar um FJÁRmál og Stofnun um fjármálalæsi
Deila grein:
