29.05.2015
Arion banki er aðalbakhjarl Nýsköpunarkeppni grunnskólanemenda
Vinnusmiðja Nýsköpunarkeppni grunnskólanemenda (NKG 2015) fer fram þessa dagana. Í dag fer hún fram í Háskólanum í Reykjavík (HR) og á morgun laugardaginn 30. maí í Arion banka Borgartúni. Lokahóf verður sunnudaginn 31. maí kl. 13.00, í Sólinni í HR.
Um það bil 1975 hugmyndir bárust frá yfir 3000 hugmyndasmiðum – víða um land. Hugmyndir þátttakenda í vinnusmiðju eru fjölbreyttar og leysa þarfir og vandamál í daglegu lífi. Þar má nefna garnhaldara, barnabauk, endurvinnanlegt dross, blýanta – gorma – yddara, „sick“ tölvuleik, ýmis öpp og fleiri skapandi hugmyndir.
Tilgangur vinnusmiðju er að hver þátttakandi fái tækifæri til að þjálfa sig í ferlinu – frá hugmynd að vöru til verðmæta. Nemendur útfæra hugmyndir sínar með teikningum, smíðum, textíl, forritun, gerð viðskiptamódela og þjálfun framsögu, undir dyggri leiðsögn fulltrúa frá NKG, SKEMA, JCI, Einkaleyfastofu, Arion banka, Háskólans í Reykjavík og Háskóla Íslands.
Lokahóf fer fram sunnudaginn 31. maí kl. 13.00 í Sólinni (HR). Þar tilkynnir verndari NKG, forseti Íslands, Hr. Ólafur Ragnar Grímsson verðlaunahafa. Verðlaun eru í boði Nýherja, Skema, HÍ, Nýsköpunarmiðstöð Íslands og IKEA. Illugi Gunnarsson, Mennta- og menningarmálaráðherra afhendir farandbikar til nýsköpunarskóla ársins í flokki minni og stærri grunnskóla. Hugmyndasmiðir stíga enn fremur á stokk og segja frá hugmyndum sínum og fleira skemmtilegt.
Tilgangur NKG er að gera börnum grein fyrir sköpunargáfu sinni (5., 6., og 7. bekkur) og þroska hana í gegnum vinnu með eigin hugmyndir. Virkja sköpunarkraft barna í landinu. Efla og þroska frumkvæði þátttakenda í NKG og styrkja þannig sjálfsmynd þeirra. Efla nýsköpunarstarf í grunnskólum og vekja athygli á hugviti barna í skólum og atvinnulífi.
Eigandi Nýsköpunarkeppni grunnskólanemenda er Mennta- og menningarmálaráðuneytið en framkvæmd keppninnar er í höndum NKG verkefnalausna. Arion banki er aðalbakhjarl en aðrir bakhjarlar eru HR, HÍ, SI og IKEA. Samstarfsaðilar eru Skema, Nýherji, Nýsköpunarmiðstöð Íslands, Einkaleyfastofa, JCI, Samband íslenskra sveitarfélaga, Finnupp og Markaðsráð kindakjöts.
Nánari upplýsingar eru á vef vinnusmiðjunnar og Facebook síðu.
Deila grein:
