06.07.2015
Arion banki gefur út skuldabréf í norskum krónum
Þriðjudaginn 29. júní lauk Arion banki skuldabréfaútgáfu í norskum krónum. Samtals voru gefin út skuldabréf fyrir 500 milljónir norskra króna til fimm ára. Skuldabréfin bera fljótandi NIBOR vexti að viðbættu 2,95% vaxtaálagi. Arion banki gerði á sama tíma skiptasamning sem þýðir að hluti vaxta og höfuðstóls er skipt í evrur. Vaxtakjör í evrum eru fljótandi EURIBOR + 2,74%. Umframeftirspurn var eftir skuldabréfunum. Skuldabréfin voru seld til fjárfesta í Noregi, Svíþjóð, Finnlandi, Danmörku og á meginlandi Evrópu. Pareto Securities sá um sölu skuldbréfanna.
Samhliða skuldabréfaútgáfunni keypti Arion banki til baka NOK 260 milljónir af skuldabréfaútgáfu frá árinu 2013. Arion banki hafði áður keypt 59 milljónir, og hefur bankinn samtals keypt NOK 319 milljónir tilbaka af NOK 500 milljón króna útgáfu frá árinu 2013.
Arion banki hefur einnig í dag greitt um 10 milljarða króna fyrir gjalddaga af víkjandi láni frá ríkissjóði. Þetta er í annað sinn á þessu ári sem bankinn greiðir fyrirframgreiðslu af víkjandi láni, og hefur samtals greitt um 20 milljarða af um 30 milljarða víkjandi láni. Lánið var veitt í upphafi árs 2010 í tengslum við endurfjármögnun bankans.
Deila grein:
