Arion banki í sam­starf við trygginga­félagið Euler Her­mes

Í lok síðasta árs undirritaði Arion banki samstarfssamning við hið virta evrópska tryggingafélag Euler Hermes um greiðslufallstryggingar. Með tilkomu samningsins getur bankinn boðið viðskiptavinum sínum greiðslufallstryggingar á mjög góðum kjörum.

Euler Hermes er stærsta tryggingafélagið í Evrópu á sviði greiðslufallstrygginga, með um 34% markaðshlutdeild, en þar starfa um 6.200 starfsmenn og viðskiptavinir eru um 52.000. Standard & Poor‘s gaf fyrirtækinu einkunnina AA- og stærsti eigandi þess er Allianz með hátt í 70% eignarhlut. Við undirritun samningsins hefur Ísland nú bæst í hóp þeirra ríflega 50 landa sem selja tryggingar Euler Hermes.

Ferlið gengur þannig fyrir sig að íslenskt fyrirtæki sækir um greiðslufallstryggingu hjá Faktoringu Arion banka til að tryggja sig gagnvart greiðslufalli erlendra greiðenda. Tryggingafélagið metur greiðandann og gefur út tryggingu sem endurspeglar mat þess á greiðsluhæfi viðkomandi og hvort hann sé líklegur á að lenda í greiðslufalli. Þannig fær sá sem sækir um greiðslufallstryggingu mat á viðskiptavinum sínum en slíkt mat getur bæði verið dýrt í vinnslu og tímafrekt. Komi til vanskila tekur tryggingafélagið að sér innheimtu kröfunnar en íslenska fyrirtækið fær kröfuna greidda í gegnum Faktoringu Arion banka. Erlend innheimta getur verið flókin, tímafrek og kostnaðarsöm en innheimtuþóknun tryggingafélagsins er einungis brot af því sem hefðbundin innheimta myndi kosta. Faktoring Arion Banka sér um allt utanumhald og tilkynningar til tryggingafélagsins sem og fjármögnun sé samningur um hana fyrir hendi.

„Viðskiptakröfur eru í mörgum tilvikum einn af stærstu og mikilvægustu veltufjármunum félaga og því er eðlilegt að þær séu tryggðar rétt eins og fasteign eða framleiðslutæki. Greiðslufallstryggingar eru mikið notaðar í útflutningi og hefur eftirspurn eftir þeim aukist í núverandi efnahagsástandi þar sem traust hefur minnkað og menn séð að jafnvel traustustu fyrirtæki geta fallið. Eins eru greiðslufallstryggingar mikið notaðar sé um nýja viðskiptamenn að ræða þar sem greiðslusagan er lítt þekkt,“ segir Hrönn Greipsdóttir, forstöðumaður Faktoring Arion banka.

Ef þú hefur áhuga á að kynna þér greiðslufallstryggingu Arion banka betur hafðu þá samband í síma 444-7000 eða með því að senda fyrirspurn á netfangið faktoring@arionbanki.is.