Arion banki lækk­ar vexti

Arion banki hefur lækkað vexti á verðtryggðum íbúðalánum bankans og jafnframt fjölgað valkostum er kemur að verðtryggðum íbúðalánum.

Verðtryggð íbúðalán Arion banka með föstum vöxtum út lánstímann bera nú 4,20% vexti. Breyting þessi hefur ekki áhrif á fasta vexti núverandi lána.

Nú geta viðskiptavinir Arion banka jafnframt tekið verðtryggð íbúðalán með föstum vöxtum til fimm ára. Lánin bera 3,85% vexti og að fimm árum liðnum er hægt að velja um aðra valkosti sem í boði eru hjá bankanum eða framlengja lánið á þeim kjörum sem þá bjóðast.

Einnig býður Arion banki nú verðtryggð íbúðalán með breytilegum vöxtum og eru þeir nú 3,75%.

Arion banki býður áfram óverðtryggð lán með föstum vöxtum til fimm ára. Viðskiptavinum bankans býðst einnig að blanda saman verðtryggðum og óverðtryggðum íbúðalánum. Breytingarnar nú eru liður í stefnu bankans að bjóða upp á fjölbreyttar leiðir í fjármögnun fyrir viðskiptavini bankans.