01.06.2011
Arion banki náði markmiðum Beinu brautarinnar
Gerði öllum fyrirtækjum tilboð fyrir 1. júní
Samkvæmt samkomulagi við ríki og atvinnulíf áttu íslensk fjármálafyrirtæki að ná því markmiði að gera litlum og meðalstórum fyrirtækjum tilboð um úrlausn skuldavanda þeirra fyrir 1. júní 2011. Arion banki hefur nú náð því markmiði.
Undanfarna mánuði hefur verið unnið ötullega að því innan bankans að leysa úr skuldavanda þeirra 470 fyrirtækja sem falla undir samkomulagið af hálfu bankans. Öllum þessum fyrirtækjum hafa nú verið gerð tilboð. Málum 320 fyrirtækjanna er að fullu lokið. Þau 150 fyrirtæki sem eftir standa eiga eftir að taka afstöðu til tilboðs bankans.
Þessu til viðbótar hafa fjölmörg fyrirtæki, sem ekki falla undir samkomulag Beinu brautarinnar, farið í gegnum úrlausnarferli Arion banka. Þannig er komin niðurstaða í úrlausnarmál rúmlega 700 fyrirtækja og mál 250 fyrirtækja til viðbótar eru vel á veg komin. Alls hafa því um 950 af þeim 1.000 fyrirtækjum, sem þurfa á fjárhagslegri endurskipulagningu að halda, hafið úrlausnarferlið.
Höskuldur H. Ólafsson, bankastjóri Arion banka:
„Við höfum lagt höfuðáherslu á að ljúka fjárhagslegri endurskipulagningu fyrirtækja og einstaklinga eins fljótt og auðið er. Fjöldi starfsmanna hefur unnið að þessum málum svo hægt væri að gera þessum 470 fyrirtækjum tilboð fyrir 1. júní eins og samkomulagið um Beinu brautina kveður á um. Reyndar er komin niðurstaða í úrlausnarmál rúmlega 700 fyrirtækja. Það er mikilvægt því það skipir okkur öll máli að óvissu varðandi skuldastöðu heimila og fyrirtækja sé eytt sem fyrst. Að því vinnum við hörðum höndum. Við erum sem betur fer það langt komin, að við getum í ríkari mæli horft fram á veginn og unnið með viðskiptavinum okkar að málum sem skipta þá máli.“
Deila grein:
