10.05.2010
Arion banki styrkir atvinnulaust ungt fólk
Arion banki hefur lagt til húsnæði ásamt húsbúnaði og tölvum sem styrk við átaksverkefni til eflingar ungu fólki án atvinnu á Akranesi. Bankinn leggur til húsnæðið til 14 mánaða án endurgjalds. Húsnæðið hefur verið nefnt Skagastaðir.
„Tækifæri“ er verkefni fyrir ungt atvinnulaust fólk sem felst í því að skapa grundvöll til góðra verka. Um er að ræða eins konar hugmyndasetur þar sem áhugasamir fá aðstöðu og stuðning til þess að sinna uppbyggjandi verkefnum og skapa sér eigin tækifæri.
Samkvæmt tölum frá Vinnumálastofnun á Vesturlandi voru um 100 ungmenni á aldrinum 16-30 ára án atvinnu á Akranesi í byrjun janúar 2010. Mikilvægt er að stuðla að því að fyrsta reynsla ungs fólks á vinnumarkaði sé eins jákvæð og mögulegt er. Því er lögð áhersla á að virkja krafta þeirra strax.
Verkefnið er sett upp til tveggja ára til að mæta því atvinnuleysi sem nú blasir við og þegar hafa 45 ungmenni skráð sig en það er tæplega helmingur þeirra sem er á atvinnuleysisskrá. Verkefninu er ætlað að skapa aðstöðu fyrir þennan hóp. Aðstöðu þar sem hægt verður að vinna að skapandi verkefnum, hitta aðra, rjúfa einangrun með ögrandi verkefnum og halda uppi virkri atvinnuleit.
Arion banki er stoltur af því að leggja verkefninu lið.
Skagastaðir á Facebook
Stutt heimildarmynd um verkefnið
Deila grein:
