02.04.2014
Arion banki tekur þátt í Leyndardómum Suðurlands
Í tilefni af sunnlensku hátíðinni Leyndardómar Suðurlands prýða nú ljósmyndir Ragnars Axelssonar, einnig þekktur sem RAX, útibú Arion banka á Suðurlandi en sýning hans hefur verið tekin niður í Borgartúni 19 og sett upp í Hveragerði, á Selfossi, Hellu, Vík og Kirkjubæjarklaustri. Arion banki tekur þátt í hátíðinni Leyndardómar Suðurlands, sem hófst síðastliðinn föstudag og stendur til 6. apríl, en myndefni sýningarinnar tengist að hluta þessu landssvæði.
Íris Stefánsdóttir, er listráðunautur bankans.
„Myndir þessarar sýningar eru frá Landmannaafrétti og Grænlandi en ljósmyndir Ragnars eru flestum kunnar. Í þremur bókum sínum: Andlit norðursins, Veiðimenn norðursins og Fjallaland hefur hann dregið saman myndfrásagnir af ólíkum heimum norðurslóða og miðlað þeim í sýningum og prentmiðlum um heim allan. Í þessum einstöku myndum sýnir Ragnar menningu sem er óðum að hverfa, baráttu manna og dýra við harðgera náttúru og gamlar hefðir veiðimanna og leitarmanna á fjöllum.“
Þess má til gamans geta að Tónlistarskóli Rangæinga mun skemmta gestum og gangandi í útibúinu á Hellu föstudaginn 4. apríl frá kl. 14:30 til kl. 15. Sama dag munu nemendur úr Tónlistarskóla Árnesinga ásamt Margréti Stefánsdóttur taka nokkur lög í útibúi bankans á Selfossi frá kl. 15 til kl. 15:30. Allir velkomnir.
Deila grein:
