Arion banki val­inn banki ársins á Ís­landi af tíma­rit­inu The Ban­ker

Tímaritið The Banker, sem gefið er út af The Financial Times, hefur valið Arion banka sem banka ársins á Íslandi árið 2013. Er þetta í fyrsta skipti frá árinu 2007 sem tímaritið veitir íslenskum banka þessa viðurkenningu og er það til marks um þann árangur sem náðst hefur á undanförnum árum við uppbyggingu nýs fjármálakerfis hér á landi. Höskuldur H. Ólafsson, bankastjóri Arion banka, veitti viðurkenningunni móttöku fyrir hönd bankans.

Í rökstuðningi fyrir vali sínu á Arion banka litu fulltrúar tímaritsins ekki síst til árangurs bankans við að auka fjölbreytni fjármögnunar. Arion banki hefur sótt sér nýja fjármögnun bæði hér á landi sem og erlendis og minnkað þar með vægi innlána í fjármögnun bankans. Fyrr á árinu gaf Arion banki út skuldabréf í norskum krónum og varð þar með fyrsti íslenski bankinn frá árinu 2007 til að gefa út skuldabréf í erlendri mynt. Að auki var bankinn fyrstur íslenskra fjármálafyrirtækja til að gefa út óverðtryggð sértryggð skuldabréf á innlendum markaði.

The Banker horfði einnig til þess mikla árangurs sem náðst hefur við að lækka hlutfall lána í alvarlegum vanskilum í lánasafni bankans. Íslenskir bankar hafa glímt við hátt hlutfall vanskila en hafa náð miklum árangri á undanförnum árum ekki síst í kjölfar þeirrar umfangsmiklu vinnu sem farið hefur fram við fjárhagslega endurskipulagningu fyrirtækja og heimila.

Þessu til viðbótar var við val á Arion banka sem banka ársins á Íslandi horft til öflugrar vöruþróunar bankans og þá ekki síst þess frumkvæðis og þeirra nýjunga sem Arion banki hefur kynnt á íslenskum íbúðalánamarkaði á undanförnum árum eins og óverðtryggð íbúðalán með fasta vexti til fimm ára. Einnig var horft til þeirra fjölbreyttu þjónustuleiða sem Arion banki býður viðskiptavinum sínum upp á og þá ekki síst Arion banka appsins fyrir snjallsíma sem hefur verið afar vel tekið af viðskiptavinum bankans.

Höskuldur H. Ólafsson, bankastjóri Arion banka:

„Það er virkilega ánægjulegt að fá viðurkenningu þessa virta fagtímarits. Okkar markmið á undanförnum árum hefur verið að byggja upp góðan banka. Það uppbyggingarstarf hefur bæði falið í sér að taka á erfiðum úrvinnslumálum frá fyrri tíð en einnig að horfa fram á veginn og leita nýrra leiða til að veita okkar viðskiptavinum góða þjónustu og mæta síbreytilegum þörfum þeirra. Starfsfólk bankans á hrós skilið fyrir þeirra góða starf, þetta er viðurkenning á þeirra störfum.“