Arion banki við Hlemm verður "tape-­aður" á Menningarnótt

Arion banki, Apear Collective og Urban Utd. munu standa fyrir óvenjulegri uppákomu á Menningarnótt fyrir utan útibú Arion banka við Hlemm. Þar mun listahópurinn Apear Collective umturna svæðinu með hjálp límbands.

Um 20 listamenn munu taka þátt í verkefninu en Apear Collective er hópur fjöllistamanna sem koma víða að. Meðan á gjörningnum stendur munu plötusnúðar spila og börn fá blöðrur frá bankanum. Við Hlemm og í nánasta umhverfi verða svo ótal uppákomur í gangi yfir daginn. Markmiðið er að búa til skemmtilega stemningu á svæðinu og gera borgina líflegri.

Límbandslist („Tape Art“) er tiltölulega nýtt form götulistar og verður þetta stærsti viðburður sinnar tegundar á Íslandi. Oftar en ekki er götulist í hugum fólks tengd skemmdarverkum og sjónmengun, en límbandslist er jákvætt form götulistar sem eyðileggur ekkert og auðvelt er að fjarlægja listaverkið.

Sérstakur gestur verður Fejzo Kosir en hann er í fremstu röð listamanna í Evrópu sem hafa tileinkað sér þetta sérstaka listform.

Listamennirnir munu hefja gjörninginn klukkan ellefu um morguninn og halda áfram fram eftir degi. Hvetjum við alla til að kíkja við og fylgjast með umbreytingu Arion banka við Hlemm og þiggja kaffisopa. Buff og blöðrur verða í boði fyrir börnin.

Hér má sjá myndband af Youtube sem sýnir þetta form götulistar og listamanninn Fejzo að verki.