Ár­veknisátakið Bleika slauf­an hefst í dag

Bleika slaufan, fjáröflunar- og árveknisátak Krabbameinsfélags Íslands, hefst formlega í dag 1. október 2011. Eins og undanfarin ár er Arion banki aðalstyrktaraðili átaksins.

Krabbameinsfélagið hefur sett sér það markmið að selja 50 þúsund slaufur fram til 15. október þegar slaufusölunni lýkur. Verndari Krabbameinsfélagsins, frú Vigdís Finnbogadóttir afhenti í gær við hátíðlega athöfn fyrstu slaufurnar sex konum sem allar hafa barist við krabbamein.

Mikil leynd var yfir hönnun slaufunnar í ár. Krabbameinsfélagið fékk konur frá Suður-Afríku til að perla slaufuna, koma þær frá þorpum sem kallast Zulufadder. Flestar konurnar eru ömmur og annast þær margar 12-14 börn hver, því börnin hafa misst foreldra sína úr alnæmi. Í raun hefur heil kynslóð á þessu svæði horfið sökum sjúkdómsins.

Með kaupum á Bleiku slaufunni í ár er því bæði verið að styrkja Krabbameinsfélag Íslands sem og Zulufadder þorpin. Arion banki hefur fest kaup á um 1000 slaufum til að gefa starfsfólki bankans og hvetjum við alla til að styrkja Krabbameinsfélagið með kaupum á Bleiku slaufunni.